【大茶飯】誠意回購搵到食（青冰）
股神巴菲特16年初開始買入蘋果，主要賣點就係現金多，業務穩定，蘋果早幾日話，會動用一千億美元回購股份，刺激股價在周五創歷史新高。唔講可能你唔知，巴菲特本人唔太喜歡回購，廿年前曾經講過，除非股價跌穿其核心價值，否則不會作回購，不過佢自己在11年都自打咀巴了，
投資旗艦巴郡試過回購，當日仲俾人笑佢係為咗托價添。
由於在美國市場，股息是需要交稅，所以如果公司係揸好多現金，又唔想益咗政府，回購就係較常用的回饋股東方法。侵侵的稅改，促使了蘋果將海外的巨額現金，匯番美國，年頭為此就一次性繳交了380億美元的稅，當時市場已經預期，現金回國後都係為咗增派息及回購。
在港股市場，可能係冇股息稅的關係，大型回購比較少見，最勁的就係匯控(0005)在16年中期業績後，忽然宣佈25億美元回購計劃，刺激股價在一個月內累升了兩成，自此市場年年都憧憬佢回購，如果冇又或者比預期少，反而變了一個怒隊的藉口，上星期五在首季業績報告後宣佈20億美元回購，本為好事，但衰就衰在講明今年只此一次，拖累股價單日跌3.5%。
對於中小型股份，回購卻是一個值得留意的舉動，隨時搵到食，尤其是那些從來未回購過，或是十幾年先做一次的。做得回購，公司梗係認為自己股價低迷，先會出手，如果在某水平持續出手一段時間，值搏率更高，而那些買完一兩日又停下，股價再跌深啲先再出手，由於誠意較低，青冰通常會避開。有些公司手頭現金不算充裕，債亦唔低，呢啲公司出手回購都唔去還債，托價味濃，亦需避開。
利福中國(2136)自4月11日首次回購後，股價累升63%，翻查記錄，見到佢都唔係日日回購喎，係，不過只係礙於條例所限，有時買唔到而已，根據公司回購守則，只要股價較過去5天平均價高5%以上，就不得回購，所以只要你細心睇番，冇回購那幾天，全因升得太急，不是沒誠意啊，睇番上星期五，股價在高於5天平均價的5%水平，公司便積極回購了763萬股，佔成交量的38%，暫時證明公司有得買就一定出手，有興趣的戰友不妨多加留意。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
