【實力取勝】今年書展好精彩（陳承龍）（第181期）
2018-6-14 17:16:23
首先講句唔好意思，小弟星期二no show，多得策略王其他同事幫我頂節目，咁小弟嗰日點解no show呢？唔係因為個市淡冇嘢炒，而係因為書展。其實策略王呢幾年參加書展，都係阿正幫手搞，講真
我掛住炒股，又要做直播節目，邊有時間搞喎。
話說喺舊年書展完咗，即係2017年7月左右，阿正已經不斷催小弟交稿，不過小弟作為一個炒股同賭錢天才，梗係留返最尾先開筆啦，所以阿正提早咁多催，真係好盡責嘅表演，因為佢睇死我會遲交，小弟亦如佢所料，真係遲交。
去到2018年頭，小弟繼續好鎮定，喂，幾萬字啫，三幾晚都寫完啦，但去到3月左右，阿正繼續不斷催我，小弟亦不敢反抗，仲開始覺得有啲不妙，所以搵咗小弟嘅好拍擋劉幸鈺，幫手寫投資心法嗰一part，方法係我錄音，佢筆錄出嚟，幸鈺不負眾望喺deadline之日交稿，搞到阿正要係facebook大讚佢係佢嗰日「最敬重嘅師奶」。喺幸鈺交齊稿10幾20日後，小弟終於有壓力，於是放假趕工，放工又趕工，寫自己點出道、點樣入行等等往事，但都仲未寫曬，嗰晚終於寫到第二日唔知醒，真係唔好意思。之但係，小弟臨急抱佛腳之餘，亦都好追求完美，所以越寫越興奮，係咪想知本書內容有乜嘢？大家書展買嚟睇咪知咯。
另外呢，高明今年書展都會出書，係佢做咗傳媒咁多年後，第一次出書。高明呢本書，據阿正講出嚟，係集天下投資心法嘅大成，然後用高明獨門嘅邏輯，深入淺出咁教大家應用。如果大家有睇策略王直播室，都知高明會喺《高明頂》，分享好多國際級投資大師嘅心法，收視有時比講輕鬆話題更加好，證明策略王fans有質素同有求知欲之外，亦證明高明喺分析同研究投資方法自成一家，小弟都好期待，亦都希望呢本書幫到策略王fans，吸收唔同嘅投資心法。
至於圖太郎呢，今年就會出《圖表實戰》第二版，除咗update舊版嘅資料，據阿正講，圖太郎仲有加一兩個新chapter，講下佢圖表以外嘅投資心法，係咪好吸引呢？不過據美術部講，圖太郎本書進度同小弟嗰本差唔多，哈哈。
策略王已經參加咗兩年書展，試過出唔同類型嘅讀物，得出嚟嘅經驗同收到嘅意見，都係要求我哋主攻財經書，well，作為一個有領導地位嘅大灣區財經傳媒，我哋梗係從善而流。除咗出書，書展仲會有好多同讀者交流嘅活動，希望到時喺書展見到大家啦。
實力取勝 - 陳承龍 舊文
來源 source: http://www.winmoney.hk
