笑到最後：科技霸權的反思
■預計未來5年內，會有第一間科技公司被起訴，fb機會最大，數據業務會被拆走。 資料圖片
量化寬鬆第一大得益者係海嘯前大槓桿不負責任嘅老人家，唔使破產之餘，仲發多一次達。
第二大受益者就係科技公司，因為超低息令原本冇盈利嘅公司，可以一直蝕本經營，搶佔市場第一位後
，先慢慢諗點賺錢。
科技公司獨大，另一原因就係發展得太快，同時，海嘯前嘅「old sea food」繼續掌權，享受量寬利益，毋須學習新事物，對科技霸權一無所知，令科技公司「韜光養晦」享受歷史以來最長不受政治影響嘅壟斷期。
facebook嘅「劍橋分析事件」，透過操縱賬戶資料影響選舉結果，終於摑醒咗班old sea food。雖然fb星期一再創新高，市場當冇事咁炒，但係高明肯定全球對科技仰慕嘅風氣已轉，將會無日無之受政治騷擾。
fb行政總裁朱克伯格上月底到歐洲議會作供，歐洲人民黨黨魁韋伯指fb規模過大，須受監管及分拆，帝國解體可能又再歷史重演。
一百年前嘅標準石油：控制美國8成石油、公司控制權掌握喺少數人士手中、搵到食再投資鐵路業鋼鐵業等等，係一間富可敵國嘅企業，最後被告反壟斷法而被解體。
科技企業貴為現今霸權，比起標準石油更勁，因為現時網上世界近乎玩曬、霸權企業數得出嗰三五間、大量併購，更厲害係：佢掌握每個人嘅所有私隱，並包裝成「大數據」。兩者條件非常接近，加上風向已轉，高明預言，未來5年內會有第一間科技公司被起訴，fb機會最大，數據業務會被拆走。
大家可能會覺得，科技企業已經無可取代，被政治搞完一輪，股價會繼續升。翻睇近例微軟，2001年就反壟斷法和解，股價就浮浮沉沉咗十幾年，亦被Google、蘋果等趕過。對於普通小投資者嚟講，預言未成真當然應繼續炒，但一注獨贏咁睇好科技股嘅時間，可能已成過去。
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.finance.appledaily.com
