Money Walker：中港矛盾變大灣區矛盾
■大灣區規劃尚未面世，香港點能夠從中融合中受益，有待政府解話。 資料圖片
大灣區規劃即將出爐，社會各界人士紛紛化身大灣區推廣大使，認為只要解決到交通、流動上網、工作機會等問題，港人就會樂於到大灣區發展。
通勤交通費貴而
時間長、工資與生活質素遠不如香港、文化與語言差異大、醫療與治安有待提升，固然係港人抗拒大灣區嘅重要原因，種種問題短期內亦不見得有方法解決。不過大灣區以至整個中國，最令人卻步嘅係對私有產權與人權保障嚴重不足。大量內地人來港買樓或移民海外，亦係基於想尋求呢兩方面更佳保障，結果多年來不論人才與資金，都從中國大舉外流，造成國家損失。
香港與大灣區將來融合後，如果中央無法亦無意提升區內私有產權與人權至香港現有水平，可以想像得到，隨住區內居民流通隔閡打破，其餘10個城市嘅「大灣區人」只會傾向來港發展。倘若大灣區內人口集中於香港，將導致香港有限嘅土地與其他資源更為緊張，現有中港矛盾時只會演化為大灣區矛盾。
其實，將經濟形勢與文化背景差天共地嘅國家或地區融合，只會製造無限手尾與摩擦，歐盟就係樣辦。多方合作可以達致共贏，但要完全融合就肯定會有大量問題衍生。大灣區規劃尚未面世，香港點能夠從中融合中受益，仍有待政府解話，但講到底，廉潔營商環境與健全法制，先係香港一直賴以成功不可或缺最根本基礎。一旦香港法制趨向腐化，無論如何坐享背靠祖國嘅優勢，終有一日都會從國際舞台上墜落。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com
