大棋局：中美仍在互摸底價
■在貿易戰中，美國仍在試中國底價，用壓力逼中國放多口價，放到貼近美國底價為止。資料圖片
有兩個疑問我們可想想。返過大陸用內銀服務都會媽媽聲，如果歐美資銀行可以任意在內地擴張做生意，仲有幾多人願意用內銀？如果外資可以持股內銀多過一半，有幾多
原高層會被踢出街？
1989年拉美債務危機，拉美國家頂唔順要搵IMF同世界銀行幫拖。經濟學家威廉臣寫下一份《華盛頓共識》，教拉美國家要財政緊縮、開放貿易等等。《華盛頓共識》被認為係新自由主義代表。但拉美國家聽佢支笛後發覺唔對路，由於本國產業落後，整整嚇本國產業就被外資巨企玩曬。
中國見到拉美國家的經歷，見到蘇聯倒台的教訓，尤其共產黨信馬克思歷史唯物辯證法，認為事情會從正、反、合形式推進，所以為免重蹈覆轍就會將事情倒轉來做。於是國進民退，實行國家資本主義。做得起嘅民企，冇人相信佢真係純粹一間民企。內地人借用魯迅筆下人物，稱老闆背後都有一個趙家人。
咁就嚟料。原本開放不開放係經濟上的問題，考慮是否有利改進本國產業，會否扼殺萌芽中的產業。在中國模式底下就多一分削藩考慮，會否削減藩鎮封邑食祿。商鞅變法第一個跳出嚟反對的，係舊貴族既得利益者。因此貿易戰中國開放定唔開放，枱面上能堂而皇之地講嘅係順差、逆差等數字，枱底下真實要面對嘅係利益分配的數字。
中國處下風
新自由主義又好，國家資本主義又好，只係一個名堂，不能太認真。尼采嘅《查拉圖斯特拉如是說》落在希特拉手上變咗樣，馬克思嘅《共產黨宣言》在列寧、毛澤東手上亦唔同玩法。自由貿易係一個華麗名堂，過去中國固然食盡全球化下對外自由貿易的好處，而當時美國亦需要中國這個忠實的美債擁躉。只不過時移世易，中國覺得唔需要再做美債擁躉，美國亦覺得中國已經有錢，那自由貿易自然最適合用嚟長驅直進。
美國財長再次放聲貿易戰有偈傾，只要中國「改變」。美國嘅打法係，話我列出的條件就係底價，而非叫價。底價你唔受，先讓你痛楚，再傾。其實即仍然在試中國底價，用壓力逼中國放多口價，放到貼近美國底價為止。
美國經歷過次按爆煲，現正稍為好轉；中國未經歷過樓災，極之害怕資產泡沫爆破。正是這種階段錯落，令中國處於下風，只敢眼神扮斬釘語氣懶截鐵地強硬。底價係會隨時勢而改變，一旦貿易戰和談之時，也就係中國被撬開缺口之時。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.finance.appledaily.com
