中環在線：朱太為冼國林遭遇難過 - 李華華
本月財經界有兩位人物最受關注，包括剛過身嘅759阿信屋母公司CEC國際（759）創辦人林偉駿，同埋第一信用（8215）原大股東冼國林（冼師傅）。冼師傅本月初參加
金利豐（1031）老闆娘喺韓國濟州舉行嘅60歲生日會，不幸受細茵感染左眼而須切除。
金利豐噚日股東會，朱太講返呢件事，指當時唔清楚冼師傅嘅情況，只知佢有發燒，旅程首日兩人仲有打招呼，佢都估唔到事情嚴重性，對冼師傅嘅遭遇感難過，期望對方早日康復。事後佢有留言畀對方，但未獲回覆。佢話，暫時唔適合到醫院探望，相信冼太亦唔希望太多人去騷擾，「等佢再好啲再到醫院探佢」。
講到759阿信屋老闆林偉駿，朱太話自己平日都有幫襯759，大讚759貨品嘅價錢比超市平，貨品又有季節性，對林偉駿離世感難過，認為佢係典型香港精神，希望新管理層能夠承傳佢精神，做得更好。
優品360°老闆林子峰日前話，如果10億元以下會考慮收購阿信屋母企CEC國際，朱太就唔評論，只係話「值幾錢係按個人判斷」。
李華華
mailto:LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
