中環在線：
康宏案 郭英成聽審：
支持個仔好正常 - 李華華
佳兆業主席郭英成指自己精力充沛，可以日做18粒鐘。
譚德潤攝
康宏（1019）主要股東、內房股佳兆業（1638）少東郭曉群入稟高院，要求將舊年底康宏股東特別大會（EGM）嘅結果推翻，本周案件開審，郭曉群亦因此首度現身，可惜
佢一離開法院就戴上口罩，唔去法庭始終唔知佢廬山真面目。
不過佢爸爸，即係佳兆業主席郭英成認真係廿四孝老豆，業績期都抽空陪阿仔聽審。噚日喺佳兆業業績會上，郭英成笑住話:「做老竇支持嚇個仔都好正常」，又指自己精力充沛，時間多過人，可以日做18粒鐘，所以就算聽審都唔會影響到佢嘅工作。至於係咪繼續日日去法庭陪仔呢，佢就話要視乎時間安排。
佢冇提到阿仔係咪喺佳兆業返工，但有消息人士就報料，指間唔中都會見到郭曉群喺公司出現。
許榮茂輕鬆講工作
另一邊廂，世茂房地產（813）主席許榮茂好早已經安排阿仔許世壇打理公司，難怪佢噚日喺業績會上，可以輕輕鬆鬆咁話，近年工作重心，除咗制定公司戰略同推動大項目外，就係參加社會公益活動，例如過兩日就會帶團去四川探訪愛滋病患者，早前亦帶港青到內地考察咁話。
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
