中環在線：這些機會……
上市敲特大銅鑼有條件
■歌禮製藥噚日上市，李小加（左）現身撐場。
歌禮製藥（1672）噚日上市，作為首間採用無收入生物科技企業新制嘅新股，除咗有港交所行政總裁李小加現身撐場，仲可以敲港交所最大、重200公斤嘅特大銅鑼。呢個鑼就係上月小米（1810）掛牌，小米創
辦人雷軍敲唔響嗰個大鑼，仲俾市場質疑小米唔單止「同股不同權」，仲係「同股不同鑼」。
李小加：鑼，本來就是拿來敲
可能為咗釋除疑慮，李小加噚日突然主動提到，講明用特大銅鑼要達以下其中一項指標，一係某章節獨特創新嘅第一股，二係有時代意義嘅第一間上市公司，三係集資規模打入歷來港交所十大。照咁講，大鑼下星期應該又要出動，因為輪到集資543億元、本港歷來第七大集資王中國鐵塔（788）掛牌，個鑼直徑達1.8米、重200公斤，搬出搬入真係唔嘢少，真係辛苦曬負責搬運嘅港交所員工。
不過，港交所好有人情味嘅，李小加話，如果唔符合以上資格嘅公司又特別想用，可以同聯交所討論，仲話「鑼，本來就是拿來敲的」，只係若有太多家企業同日掛牌，就唔太好安排。
查實計華華話，敲乜嘢鑼都冇乜所謂，最重要股價有得升，股民有錢搵，往後公司做好本份，為股東帶來長遠利益，唔係用再大嘅鑼，都得唔到市場認可。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
