美元弱 港元仲弱
2018年08月28日
上周末人民幣、油、金、股齊升，投資市場氣氛大變，港股昨日承接呢個變化高開，結果以全日高位收市。
幾個投資市場齊齊轉向，主要係因為美國聯儲局主席鮑威爾出席Jackson Hole世界央行大會時的發言，被視為放鴿，美元回軟，資金
流向其他市場。投資者關注焦點係美元衝咗一大輪後，強勢會否告一段落。
CNBC指美元強勢或告終
聯儲局主席未發言前，投資界已金睛火眼睇緊佢發言有乜指示。CNBC引述咗幾個投資策略員分析，提醒留意美元強勢是否告一段落。市場有呢個看法，論據之一係美國來年預測增長2.4%，幅度與歐洲相差不遠，以這個增長率，好難支撐聯儲局按預期加息三次甚至四次。現時不少炒家都係揸美元，當明年所有數據都弱化，揸美元策略是否可以維持，實在令人懷疑。
有分析員認為，如果以息差計，美元有維持強勢條件，但美國赤字不斷擴大，令人擔心景氣進入尾聲，未來情況變差比變好機會更大，令美元唔係咁易維持強勢。美元強勢，令美股一枝獨秀，甚至黃金價格都受壓，但隨著市場對美元咁高能否維持表達關注，加上鮑威爾話美國經濟雖然唔錯，但睇唔到通脹有好大壓力，令人覺得儲局對加息立場趨向溫和，油、金、股都有現錢流入炒起。美元強，資金走入美元資產，美元弱，資金就要另覓落腳點，所以美元係咪真係見咗頂，對大氣候有明顯影響，值得投資者多啲研究。
美元轉弱，加上阿爺以「逆周期因子」托匯價，人仔繼續轉強，在岸人民幣兌美元即期收漲618點子，報6.8171元兌1美元，創八月以來新高。在匯價因素下，中港股市都有唔錯反彈。A股高開高收，上證指數收報2780點，升51點，升幅1.9%；深成指數收報8728點，漲243點。恒指收報28271點，大升近599點，升幅2.2%，港股升得多過內地；國企指數收報11049點，漲269點，成交金額957億元。
個股方面，騰訊(700) 回升2%，收報361元。中資金融股表現優於大市，平保(2318) 再升2.4%，收報75.55元；建行(939) 漲2.9%，收報7.11元；工行(1398) 升2.6%，收報5.88元。人民幣復強，內房股回勇，中海外(688) 揚3.7%，收報25.35元；中國恒大(3333) 漲2.77%，收報29.7元；上周五公佈半年核心利潤按年升156%的富力(2777) ，股價揚13%，收報17元。
中石化有花堪折
要留意係美元雖然轉弱，但未扭轉港元兌美元走勢，港匯昨日再觸及7.85弱方兌換保證，金管局買入39.25億港元，香港銀行體系結餘將於周三(8月29日)會降至869.76億港元。由於金管局入市後，港元匯價未見大幅回升，兌每美元仍徘徊7.8499，貼近7.85的弱方兌換保證水平，唔排除會再有入市需要，若然結餘再跌多幾百億元，咁港息可能就會上調，所以銀行界現時有兩個說法，一個講緊有可能下月會加最優惠利率；一個話由於水浸仲係嚴重，銀行可能就咁加按揭息口仲賺得多，無論邊個做法，一旦落實對個市，特別係地產股都可能會有短暫衝擊。
油價造好，三桶油都有得升，但升幅以公佈靚仔業績的中石化(386) 最突出，急揚5%，收報7.9元。中石化上半年業績，以國際會計準則計算，盈利按年增52%，至424億元人民幣，為上市以來半年度盈利新高，每股基本收益35分，中期股息豪派16分，增加60%。中石化業績理想，主要係今年油價高企，上游業務毋須虧蝕，中、下游業務盈利就飆升。油價長遠而言有升有跌，循環不息，中石化O依家行緊上升軌的運，O依家就咁睇喺有利形勢下，管理層眼見有花堪折，或者會把握機會，落實講咗好耐的分拆業務或重組啦。
陸羽仁
金融High Tea 舊文
來源 source: http://hdfin.stheadline.com
