大棋局：中美逐鹿宿命難逃 - Mr. Tregunter
中國如能維持每年GDP增長6%左右，6到7年間就會非常逼近美國，屆時美國要維持其國際規則莊家地位只會越來越難。 資料圖片
中美之間嘅較量，在未來7年只會越演越烈，睇一組數字我哋就能明白。中國2017年度GDP
12.25萬億（美元·下同），世界第二，但人均GDP只有8,836蚊。
人均GDP 8,836蚊係乜嘢概念？世界銀行統計全球218個國家及地區收入，分成4組：高收入經濟體（人均GDP 12,056元以上）、中等偏上收入經濟體（3,896－12,055元）、中等偏下收入經濟體（996－3,895元）、低收入經濟體（995元以下）。中國現處於中等偏上收入經濟體，如果中國能維持每年GDP增長6%左右，6到7年間就會躋身高收入經濟體，時間即2025年。
林毅夫曾指出，二戰後只有兩個國家由低收入躋身為高收入，一為南韓，另一為台灣。中國經濟發展若穩定，大概2025年會成為第三國。屆時GDP會非常逼近美國，銀彈攻勢只會更大唔會更細，美國要維持其國際規則莊家地位只會越來越難。看透這點自然明白，未來7年中美之間嘅較量係唔會停，唔好以為當貿易戰和談就乜事都冇。
侵侵睇住中國2025嚟打
美國方面，過去解釋過美國今輪加息上限計出係4%左右。因此美元萬劍歸宗係有時限性，加息太快，萬劍歸宗就早完，特朗普久唔久向聯儲局施壓即為此；美國嘅縮表進程，大約2020年到峯值；美國國債孳息，從掉期睇有機會2020年開始出現倒掛。因此美國嘅時間唔多，只有兩三年時間，現時睇落強勁嘅經濟增長就會減速，甚至步入衰退。
由低向中易，由中向高難。低收入國家要成為中等收入國家易，只要肯做血汗工場。二戰後點解只有南韓及台灣成功，因為大部份國家無法由低技術生產轉為高技術，而南韓及台灣技術之躍升，係得到美國扶持。中國如無法提升技術，將同大部份發展中國家一樣，墮入中等收入陷阱。因此特朗普睇住中國2025嚟打，就同八十年代對付日本一樣。拎出日本愛情文藝片常見道具：時間停止器，要你嘅經濟凝結於當下。
小牧·長久手之戰，德川家康唔夠豐臣秀吉打，就一味拖，拖到最後豐臣秀吉主動提出和談。估計中國現時亦一樣，先拖到美國11月中期選舉，貿易上反制有限，但政治上反制相信唔會少。期間讓出開放貿易，2025計劃則冇得傾，睇特朗普收唔收貨。唔得就再拖，甚至拖到美國加息周期完結。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com
