智取大市：阿里王朝靠邊個 - 晉佳
馬雲（左）係阿里嘅代表人物，但論靈魂人物，一早已經係張勇（右）。 資料圖片
上期亞馬遜科技浪未講完，今期要讓路畀馬雲。馬雲喺2016年平均每日搭超過兩小時飛機，為嘅係向各國推銷eWTP （Electronic World Trade Platfor
m），另一方面係履行聯合國嘅職務，究竟佢有幾多時間去理阿里？其實冇乜。據聞每個月馬雲同阿里CEO張勇會坐定定一次，吹幾個鐘頭水，馬雲分享嚇周圍飛嘅發現同埋新想法，張勇亦交流嚇喺阿里打拼時嘅新諗頭。表面上係主僕，但其實似係美斯同C朗坐底交流足球心得。
Apple有Steve Jobs同Tim Cook，馬雲同張勇，或許有啲異曲同工。馬雲係外星人，可以透視、改變未來，張勇會計佬出身，加入阿里僅僅11個年頭，亦係世外高人，執行能力或許比馬雲更高，「或許」其實講得有點客氣。
張勇07年出任阿里CFO，然後將公司上下避之則吉嘅淘寶商城喺垃圾桶執返嚟，變成天貓，其間創造「雙11」，前幾年阿里霸王硬上弓去搞嘅一系列業務，開始喺張勇麾下，部份已逐漸似模似樣，𠵱家再將馬雲嘅新想像，逐一放上戰線。馬雲𠵱家仍然係阿里嘅代表人物，論靈魂人物，一早已經係張勇，試問冇佢，阿里近年會變成點嘅死樣？
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
