【股場解密】做淡揀內銀股勝算高（歐陽風）
2018-9-12 9:52:58
【股場解密】做淡揀內銀股勝算高（歐陽風）
港股連跌5個交易日，而且出現板塊輪流洗倉現象，似乎唔多對路，莫非真如美銀美林所言，現在似足1998年金融危機？翻查該份報告，每次當歐元兌巴西雷阿爾創出高位之時
，就是危機爆發之日，今次亦係發生此一情況，看來10年一個周期之說很大機會應驗。
姑勿論信唔信此番預言，手上股票倉位降到最低是基本要求，事關以近期股市下跌速度，肯定不是散戶沽下來的，當醒目資金一早撤走，若果真係爆發金融危機，願意托市買貨者更少，到時只會出現更強烈的跌市旋渦。
賭大市出現十年一危機，最有機會爆災的是銀行股，渣打集團（2888）在新興市場的風險曝光最多，是優先被沽對象。其次，就數到內銀股，揀內銀股應揀最弱果批做淡，例如曾經有分行報紙當票據的農業銀行（1288），相關期權成交活躍，單邊LONG PUT損失有限，一旦食正大跌浪會賺得好勁。
如果無玩股票期權，只玩個股窩輪或者牛熊證，則只有建行（939）及工行（1398）的相關淡倉較活躍，農行牛熊證得1隻而PUT輪得3隻，揀無可揀。
以往一般做淡大市同做淡內銀無乜分別，但係今次講緊係債務危機引發大跌市，就唔同講法，銀行股槓桿大，無乜風浪梗係無事，但是資產價格一有大波動就會出事，而且大戶沽低指數，一定會揀大市值的內銀股，故此勝算較高。當然大前提係真係有金融危機，如果無，細細注當對沖跌市風險都好。
股場解密 - 歐陽風 舊文
來源 source: http://www.winmoney.hk
