中環在線：飛達老闆為大樹被斬傷心 - 李華華
顏太話公司𠵱家有超過七成生意來自美國。
【本報訊】飛達帽業（1100）副主席兼董事總經理顏寶鈴（顏太）經常香港、孟加拉、深圳三地走，噚日顏太喺深圳廠房趕返香港同一班記者朋友食lunch，見佢氣沖沖心情唔多好，原來公司深圳廠
房出面嘅大樹畀俾人斬曬，顏太呻從來未試過咁傷心咁痛！
顏太話，原先諗住請人返嚟種下花，綠化深圳廠房，點知間公司竟然斬樹種花，啲樹全部都種咗廿幾年，𠵱家就咁俾人斬曬真係好可惜。顏太話，綠化工程負責人都覺得唔好意思，不停道歉兼引咎辭職，只可惜斬去嘅樹有排都種唔返。
慶幸孟加拉設廠避貿戰
不過，講到孟加拉廠房，顏太就即刻開心返！最近中美貿易戰如箭在弦，不過公司冇有怕，因為早喺5年前，公司已著手喺孟加拉發展生產線，𠵱家唔少美國客要求將定單由中國轉向孟加拉生產，顏太話：「以前啲人都笑我去孟加拉（設廠），𠵱家真係好彩早咗去！」
公司𠵱家有超過七成生意來自美國。顏太話，知道有啲只在內地設廠嘅同行，有九成生意來自美國，好擔心如果中美貿易戰打起上嚟，行家們都唔知點算，「如果（貿易戰）真係嚟真，做鞋做服裝好多人都死，到時真係一殼眼淚」。
李華華
mailto:LiWaWa@AppleDaily.com
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
