美團有質卻逢亂世
2018年09月05日
打着讓人食得更好做口號的內地網上平台美團準備招股，成為小米後另一大型科網新股。有中環茶友專誠提問，呢隻大股是否買得過呢？
茶友對買科網股有興趣，但自問認識唔深，佢話O依家市況對科網股興趣欠奉，但美團基礎投資者陣容睇落遠勝小米，似
乎有大戶捧場，咁係咪可以人棄我取呢？對於美團買唔買得過，若然從基本因素分析，網上有不少內媒都有「懶人包」或觀點分析，可以自己細讀。
大致上，內媒對美團評價偏向正面，公司雖然出現虧損，但走勢正在改善。有分析話，O依家呢類科網大股上市攞唔到好價錢，大股東仍然堅持上市，反映左等錢使，同時擔心未來科網股上市潮會繼續，若然等落去唔知等到幾時。
若想認購宜實資入飛
內媒對內地科網股體驗同認識會較貼地，但美團喺香港上市，就要加番本地因素去考慮。美團五名基礎投資者，包括金融投資公司奧本海默基金公司(OppenheimerFunds Inc.)認購五億美元股份。其他基礎投資者包括英國的Lansdowne Partners、紐約的Darsana Fund以及中國國有公司中國誠通控股集團有限公司(China Chengtong Holdings Group)控股的投資基金。基礎投資者包括左外資，而且都有來頭，等同對公司質素做咗一定審查，所以真正要考慮嘅係，O依家呢個市況是否值得認購或者用咩策略。
如果要簡單比較，陸羽仁會覺得美團實力比閱文(772) 好，因為閱文主要係靠阿媽騰訊(700) ，美團則係自己打出來的一方豪強。閱文招股價55元，掛牌後一度接近翻倍，昨日收市價52.4元，已經跌穿招股價。若然美團有閱文上市時的良好市況，佢應該可以上升一倍。換轉角度講，若然佢現在定價同閱文一樣，咁佢掛牌就要破底，所以關鍵就係時機，揀邊個日子出世。
茶友未聽完就好心急追問，話小米雖然出世遇饑荒，但佢都炒左一轉喎，你點知美團唔會呢？茶友所講就係問題核心所在。按正常嚟講，O依家市況點樣，包銷商同基礎投資者都應該預左，除非市況出現大變，例如美國再大力加碼制裁中國，否則喺定價都應該會反映。依照呢個思維，美團上市定價應該會較為保守，所以大升機會雖然唔高，但照計都做好左預防急插的安全墊。由於科網新股陸續有來，一般粗嘢真係唔建議考慮，茶友若然覺得佢咁正想認購，用孖展始終風險高啲，用實資買吓，量力而為都未嘗不可。
聯通中電信傳合併
唔知係咪有大股上市在即，港股昨日氣氛稍好，騰訊更扭轉多日跌勢反彈1.7%，收報338.6元，帶動恒指高見27984點，直逼28000點關，收報27973點，升260點；國指收報10890點，彈77點，成交縮減至721億元。
中央或為加快5G發展，市傳中國最高領導層正審議一項合併中國聯通和中國電信計劃，目前尚未有最終決定。聯通(762) 尾段飆升，高見9.77元，收飆6%，報9.58元，為表現最佳藍籌股；中電信(728) 亦於尾段飆升，高見3.98元，收漲4%，報3.89元。若然成事係好消息，問題係即使有料到，都要拖一段時間至可以實現。另外長和系表現突出，長實(1113) 揚4.8%，收報58.15元；長和(001) 升3%，收報91.25元。
與中移動香港展開策略性合作的有線寬頻(1097) ，周一急升1.02倍後，周二再飆升41.7%，收報0.255元。炒風四射下，公司澄清董事會主席兼非執行董事邱達昌表示，因業務性質將需要籌集資金，僅屬個人觀點。公司指正與財務顧問討論，以探討可能進行的籌集資金方案，但目前無就任何籌集資金活動設有明確計劃。
陸羽仁
金融High Tea 舊文
來源 source: http://hdfin.stheadline.com
