中環在線：四洲70歲舵手日日吃零食 - 李華華
何耀勤攝
四洲集團（374）創辦人兼主席戴德豐一向作風低調，噚日集團旗下首間無人零食物語期間限定店喺旺角開張，吸引咗唔少傳媒採訪，
場面好墟冚！戴生一聽到記者問有關零食嘅問題就好有興趣，佢話自己70歲仲日日食零食，最鍾意就係食紫菜！
問答環節嘅時間，主持叫記者先舉手再問問題，點知戴生就先舉手，同在場朋友推介四洲粒粒橙果汁，話記者後生可能未飲過，一定要試嚇！四洲最出名就係紫菜，戴生話公司最近出嘅新產品夾心紫菜係佢嘅idea，推出夾心紫菜證明咗零食係千變萬化，好好玩同埋係一種好好嘅享受。
雖然已經70歲，但戴生話自己仲日日食緊零食，食零食係好開心嘅一件事，開心就會健康。佢特別鍾意食紫菜，因為紫菜本身有益，如果夾埋啲芝麻、南瓜、堅果就更加有益。
零食物語開無人店
零食物語第一次開無人店，戴生話，同另一合作夥伴、內地無人智能便利店營運商兼技術提供商EasyGo創辦人林樂昌識咗一年，大家好投契，傾嘅過程好順利，至於之後無人店會點發展，戴生話今次係一個體驗店嘅形式，主要係想畀香港市民體驗一下喺無人商店購物嘅樂趣，將來會唔會開無人實體店，之後先再研究喇。
李華華
mailto:LiWaWa@AppleDaily.com
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
