【實力取勝】失而復得必有好運（陳承龍）（第193期）
2018-9-6 13:09:32
睇得多小弟直播嘅朋友，都知小弟好信運，信得嚟，係有運就衝，冇運就唞下嗰隻。呢輪手風麻麻，啲股票衝幾板就即係跌，忍多兩日頂唔住，一「打」就升，好似隻百信國際（00574.HK），上述嘅事情發生
咗兩次，以為自己好冇運，正當打算收手唞一唞，專心搞「策略王電視」之際，有件好運到癲嘅事，竟然發生喺小弟身上。
啱啱周日，小弟facebook fanpage收到個神秘嘅message，唔係問我股票，唔係同我傾合作，亦唔係向我推銷，而係真係搵我。「陳先生你好，你係咪玩水上活動時跌咗部小米action cam呢，我今日潛水時執到呀！」嘩頂丫，正所謂石沈大海，跌咗就搵唔番㗎啦嘛，大海茫茫，咁都執到，仲要搵到我？係咪好犀利呢？呢位好心人仲話：「個殼就生咗啲生物痕跡同花曬的了，部機仲用到架，我都係憑你啲 video先揾到你。你約我拎返啦。」我覺得好神奇，咁都執到，部機係其我喺滘西跌嘅，都有成個月，呢位有心人喺滘西執到嘅，佢憑部機最後一條片，影到小弟跳水時跌咗，跟住一直拍，至冇電。
重點係咩呢？係呢位好心人，認得小弟呢位財經KOL。你哋知啦，雖然大家策略王fans覺得我哋一班策略王主持好人氣，但其他唔炒股嘅朋友，可能覺得小弟呀、圖爺同高明佢哋係素人都唔奇。所以呢，Action Cam失而復得呢件事，證明策略王唔止喺股壇受歡迎，隨住myTVSUPER有得睇我哋之後，會有更多人認識我哋，大家喺街見到小弟，不妨同我打個招呼喎。另一個重點，當然係「失而復得，必有好運」啦。
講番個市，呢期真係熊霸天下，圖太郎繼桐成（01611.HK）逆市大賺後，熊軍都長勝，真係賺到笑。好多股票都跌到殘，尤其係大股，股王騰訊（00700.HK）反彈完後，正大師愛股、強勢股恒生（00011.HK）萬一穿咗200蚊，都會危危乎，所以呢，呢啲熊霸天下市，要揀細市值股博反彈，好似修身堂（08200.HK）有6億現金，但市值得2億幾，又好似小魚推嘅QPL（00243.HK），單日最高升咗1倍，肯搵啲細市值嘅仙股，隨時搵到寶西藏。
實力取勝 - 陳承龍 舊文
來源 source: http://www.winmoney.hk
