【魚樂無窮】跌浪下十件重要的事（唐牛）
港股熊霸天下，恒指今年初高見33484點，以高位調整兩成作為技術性熊市指標，最後防線為26787點，與昨日26818點近在咫尺。本欄一向不為牛熊定分界，如何面對現實才最實際，趁人心惶惶之際，列舉跌浪下十件重要的事，給戰友參考之餘，亦可自我警惕。不要
孖展。孖展乃雙刀刃，升市盈利可double，跌市卻殺人於無形，將所有孖展貨沽清至為重要。現金揸手。倉位現金越多，波動性越低，自然更安心，亦可隨時為撈貨做好準備。檢視倉位。升市最愛亂掃貨，尤其是細價股，逐個戶口login，睇清楚有冇股票買咗唔記得斬，免得無啦啦蝕入肉。汰弱留強。弱股只會更弱，止蝕先沽蝕本貨，相反留住賺錢貨，皆因強股抗跌力必更強。分注撈貨。升市掃貨要快狠準，跌市則要睇定啲，因為你永遠唔知低位在哪兒，分注出擊分散風險冇壞。調低目標。過往幾年升勢浪接浪，贏錢話咁易，跌浪下硬要賺取相同回報，乃不切實際。少做少錯。易跌難升下，股票上升機會肯定少過一半，出手越少，輸錢機會越少。多做功課。繼續睇通告、睇業績，認清哪些股份值得吸納，哪些股份有毒，轉勢時自然快人一步。擬定策略。最恐慌時刻大多數一閃即逝，幾時撈貨，買乜嘢貨，短炒定長揸，全部要心中有數。樂觀面對。輸錢乃兵家常事，最緊要唔好輸信心，保本保命仔，有危有機，跌市才是財富轉移的契機，做好自己，便可做最後贏家。
唐牛fb專頁
http://www.fb.com/tongcow88
魚樂無窮 - 唐牛 舊文
來源 source: http://hk.finance.yahoo.com
