金融High Tea - 陸羽仁 2018年9月7日
一插碌低 牛證即死
2018年09月07日
恒指連跌兩日，累積跌幅一度超過1000點，不利因素最直接係美國總統特朗普話，無準備同中國就徵稅達成協議。由於關稅諮詢期周四結束，無協議就應該公佈加關稅措施。大市預見再掀貿易戰而大跌，O依家就要等睇壞消息真正面世後，會唔會帶來反彈。
港股昨日再度插穿27000點關口，造出今年低位。中環茶友問，港股插得咁勁，都係因為貿易戰同新興市場匯價暴跌雙鬼拍門，咁究竟係貿戰影響大啲，抑或貨幣影響大啲呢？從金融市場表現，陸羽仁覺得呢一跌貿易戰力度大啲，因為睇番人民幣同港元表現，無乜受新興市場貶值影響，人仔企穩，港元受匯價風暴吹襲感覺就大減。
壞消息證實或短期到底
九月港股有幾個不利因素，包括中美互徵關稅、美國可能加息，加埋新興市場危機呢樣突發嘢，如果幾劑陸續爆發，個市有可能形成梯級式下跌。月頭呢輪急跌，主要反映中美雙方傾唔成。股市通常係走喺消息前，喺徵稅措施前指數急挫咗近千點，唔排除到結果出街，淡友就會平倉，個市會短期到底，有啲反彈都唔出奇。
聽完分析，有茶友就加多句，話梯級式跌市其實好危險。如果市況係一插到底，雖然睇落可惜，但過完就一切解脫。梯級式下跌，淡友喺低位平倉，平完喺高位再沽，一浸浸咁吸走買家購買力，接貨者不斷被綁，可以輸到好傷。佢遇著疑似梯級式跌市，落注時必定保留部份實力，然後揀大股低位買入，如果成功就喺高位沽出部份平貨食胡，加添番子彈；萬一不幸被綁就必須忍手，唔好在下跌時不斷溝。雖然咁樣可以增加防禦能力，但都唔易戰勝呢種跌市陷阱，自問本錢唔多或已經好多蟹貨者，就保持觀望好過。另一種做法係反其道而行，喺反彈中沽出部份持倉，博佢插低再買番，炒自己個倉，唔加注入市。
港股經過周三大跌後，昨日反彈唔係咁夠力。雖然美股偏穩，杜指微升，恒指低開到中午跌幅又擴大，不排除係外資起身策動沽貨，恒指再度跌穿27000關，收報26974點，跌269點；國企指數收報10578點，下滑67點，成交金額1050億元。當指數插穿27000大關，大批牛證陣亡，唔少更加係新發牛證。由於淡友大力一插已經見血，大市尾段稍為反彈。
呢排北水同外資齊齊踩的騰訊(700) 跌得慘烈，下午跌幅一度接近4%，低見312元，收市挫3.14%，報314.6元，大批騰訊衍生工具輸到開巷。內地傳出收緊手遊規管，新遊戲審批短期難以外，又傳會徵稅，令到靠遊戲收益的騰訊，投資情緒大受困擾。其他手遊股都捱沽，雲遊(484) 同IGG(799) 齊跌2%；網龍(777) 走低3.5%，收報16元。
內地上周公佈《綜合防控兒童青少年近視實施方案》，控制新增網絡遊戲網運營數量。騰訊在遊戲官方微信發文公佈，將於下周對《王者榮耀》的健康系統，再次進行全面升級，屆時新用戶在首次進入遊戲時，會啟動最嚴格的實名策略，接入公安權威數據平台進行校驗。騰訊表現咁合作，顯然係驚槍打出頭鳥。
內地遊戲業者早前喺行業會議似乎已經聞到燶味，預期內地市場增長會放緩，提出開拓國際市場的口號，但係內地市場沽貨肯定比喺國際市場沽貨快，所以內資喺呢輪沽騰訊沽得幾兇，可能都係得風氣之先。
千點跌市後，第二隻同股不同權股份，內地團購同餐廳點評平台美團點評(3690) 今日起招股，將發行4.8億股B類股份，當中5%作公開發售，招股價介乎60元至72元，每手100股，入場費7272.55元，咁嘅市道下，上到市都偷笑，估計佢多數會以低位定價。
陸羽仁
金融High Tea 舊文
來源 source: http://hdfin.stheadline.com
