中航科工注資突圍
2018年10月16日
中美股市上周急插，唔單止中央喺假日都開工托市，美國近日都動作頻頻，希望可以維穩股市，皆因美國中期選舉臨近，喺呢個時候股市下跌，對美國總統特朗普嚟講唔係咁盞。
《施政》谷唔起本地基建股
貿易戰兩個主角暫時無意將戰況升級，市場傳言美國現階段無意將中國列為貨
幣操縱國，但大家維穩都係噴口水，市場最關心仲係美國中期選舉結果，一般睇法若然共和黨得利，即係特朗普嘅美國優先有市場，佢大有理由繼續採取強硬路線，咁國際貿易氣候就會維持緊張，所以市場都唔敢太過樂觀。恒指喺上周五反彈後，噚日又插番300幾點，呢啲政治市可用變幻莫測嚟形容。
內地股市持續偏軟，午後跌幅進一步擴大，再度失守2600點關口，創近四年新位。上證指數收報2568點，跌38點或1.49%；深成指數收報7444點，挫117點或1.5%。
港股氣氛更差，大市向下風險未減，悲觀情緒持續籠罩市場，恒指繼上個交易日急彈逾500點後即現回吐，收報25445點，下滑356點。
外圍待變，本地話題係《施政報告》出籠。報告發表後雖然有唔少大動作，但似乎柴台之聲多過掌聲，呢個係現今政治環境常態，動作愈多，俾人鬧的空位愈多。報告建議喺大嶼山東面起人工島，理論上應該對本地基建股有利，但消息公佈後，板塊無乜反應，普遍股價郁都唔郁。中環茶友解釋，大填海首個工程要2025年先動工，2032年先有樓賣。市場對於呢類咁長遠嘅概念，現時興趣不大，亦都唔肯定佢能否落實，否則本地基建股細細粒，一早炒到飛起。
國際建投憧憬賣產
基建股大圍炒唔起，但海航旗下嘅香港國際建投(687) ，股價就逆市上升。國際建投本身做唔少地基工程，同時擁有海航投得的啟德地皮權益。《施政報告》短期無乜大力造地，公私營合作都有啲雷聲大、雨點小，對樓價地價有支持作用。海航年前投得啟德四幅地皮，陸續出售左三幅還債，剩下一幅應該想自行發展。不過，近日市場再傳出海航加快同加大力度出售非核心資產，外界估計佢可能會連呢塊地都會出售，如果係咁佢就接近現金公司。目前，國際建投每股資產淨值有3.6元，比起市價有近半折讓。若然公司減債後，會派發現金畀母公司還債，咁資產折讓理應縮小，估計市場係有呢個憧憬，所以將股價炒上。
除左國際建投，中航科工(2357) 股價都突圍而出，主要係公司上周五宣佈，主要股東中國航空工業及天津保稅投資，將中航直升機100%股權注入，交易代價尚待釐定，擬以現金、股份或其他方式支付。公司認為，收購中航直升機符合軍民融合發展戰略及公司直升機產業發展戰略規劃，將有利於直升機業務發展。
中航去年起對公司結構不斷調整，估計係為咗重組同擴展鋪路，所以喺今年大跌市中，佢表現明顯優於大市。
知情人士話，公司管理層最近改組，母公司掌舵人譚瑞松喺上市公司都坐正，日後改組應該更方便。美資大行摩根士丹利就形容今次注資有突破，將提高集團整體證券化程度和加快軍轉民用步伐。
買呢類三四線轉型股份，成績未必同大市同步，有時會優於大市，但亦可以人升佢唔升，O依家公司有動作，股價見光後就借勢炒上，收報4.95元，升7.6%。由於股份今年無乜跌，今年買佢嘅投資者已經可以話係贏左。由於好消息見光，有興趣者最好等佢回番啲先至諗。
陸羽仁
金融High Tea 舊文
來源 source: http://hdfin.stheadline.com
