中環在線 - 李華華 2018年11月15日
中環在線：海航子公司錢債「機票」償 - 李華華
據指前海航交所的投資者可將本金欠款兌換現金券，然後買海南航空嘅機票。資料圖片 適中字型 較大字型
海航集團今年頻傳出財困，資產賣得就賣，但仍然欠落成街數。海航旗下嘅金融平台前海航交所，居然諗到錢債「票」償，上月提出以機票現金券形式，向投資者償還欠款，近至北京，遠至美國加州嘅機票都可以兌換。但搭咩機，梗係得海航旗下嘅航空公司畀你揀啦！
根據方案，投資者每5,000元人民幣本金欠款，就可以兌換一套現金券，每張券價值介乎500至3,000人仔，可用嚟買海航旗下海南航空，或是大新華航空嘅機票，國內外航線都適用，例如500元人民幣可買北京飛往上海的經濟艙機票；3,000元人民幣可支付由北京到洛杉磯嘅經濟艙機票。不過，兌換期得五年，由於買得呢類產品嘅投資者，閒閒地都投資咗過十萬，究竟要搭幾多轉機先回到本，就天曉得啦！
呢間前海航交所，成立四年，專向內地散戶出售高息理財產品，將籌集得到嘅資金，再借畀航空公司及航運公司，達數十億元人民幣。不過，今年初產品陸續到期，航交所未能按時償還本金及利息，有投資者今年8月到海航總部抗議，據聞投資者可能要等最多兩年先可以拎返本金。
查實內地公司真係好興呢套，先排有隻豬肉股就以公司生產嘅火腿，償還欠債利息，真正嘅錢債「肉」償。
李華華
mailto:LiWaWa@AppleDaily.com
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
