智取大市 - 晉佳 2018年12月12日
智取大市：悶戰的聖誕新股 - 晉佳
信義能源控主席李賢義。 資料圖片 適中字型 較大字型
華為危機帶嚟一輪港股沽壓，年尾前大家都唔想大手沽或大手買。遊資以博反彈、或換馬至非貿易戰及科技戰風眼嘅周期股為主，但睇呢類股嘅質地，唔覺得能夠跑得有幾遠。賭股向來係中上級、最緊貼大市氣氛嘅周期性股份選擇，見賭股最快起動反彈，完全冇大型領袖板塊可以明顯跑贏賭股，反映投資者都覺得冇乜股揀得落手。
信義系拆完又拆，將營運太陽能發電站嘅信義能源（3868）分拆上市，信義光能（968）本來經營光伏玻璃同太陽能發電站，𠵱家968保留發電站建設工程，3868上市後會向968收購建設完成嘅太陽能發電站，然後賺電費。根據政策，3868嘅太陽能項目併網後原則上20年內的發電量可按同一適用比率收取上網電價，能見度高。3868會變咗類似REIT咁，買入資產賺固定收益，然後派高息。
本來美國進入加息周期，對偏向收固定收益嘅企業不利，但偏偏喺3868準備上市途中，美國加息預期有變，3868突然多咗個不加息概念受惠因素。原本968股東每持有40股買1股3868，點知變為10股買1股基準，貨源再歸邊。如果嚟緊大市回穩，信義能源21號上市後表現未必差。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
