貼地風管 - 鄭發 2018年12月24日
貼地風管：FinTech之天才與白癡 - 鄭發
金融機構力谷FinTech。 適中字型 較大字型
呢個世界上，有FinTech、有RegTech、有SupTech、SecTech、PayTech，仲有InsurTech。唱出來有啲似許冠傑嘅《天才與白癡》，而參與這些乜Tech物Tech嘅人當中，就正如歌神所唱：「邊個係天才，邊個係白癡，扮懵定蠢才，冇咁易會知」。
曾經有位科技界人士咁同我講：「點解要係FinTech？由Fin（金融機構）搞Tech太慢太保守。應該係TechFin先啱，由Tech（科技公司）搞 Fin先會真正創新。」懂我的朋友唔講呢啲，這位仁兄明顯不懂我，為了讓大家熟絡一點，我問佢：「咁請問你公司有幾多人做合規？幾多人做風管？幾多人真正做過金融？以前俾乜嘢機構監管過？知唔知公司的董事和高管有乜法律上的責任和風險？金融機構將風險分成幾多種類？每種風險點量度同監控？有乜MIS？報錯數畀監管機構有乜後果？達唔到監管要求又有乜後果？……」係我衰，寸完佢就走人，無解釋到自己立場，所以今次補番數。
新科技本身絕對係好嘢，因它可以提供到新方法，更有效處理問題。例如生物認證技術，比簽名和密碼便捷可靠。但關鍵成功因素就是流程重整。以零售業務為例，我路人甲認為，大多數金融機構仍未能把整套客戶建立、維護、交易、監察的流程徹底重整，現時很多程序仍要實體遞交、簽名或入密碼，以致生物認證技術的效用未能充分發揮。科技公司眼中，金融機構係大白象，流程複雜僵化，唔想改、唔識改，改完又成日出事，因此由 Fin帶Tech，行業改變會慢到跌渣。
咁科技公司又點呢？六個字：唔知自己無知！科技公司好多時都唔明白金融機構和金融市場運作，對於行內常見的監控流程，它們看不透其背後目的。雖然有部份科技公司虛心學習和投放資源，但也見過不少科技公司不學無術，睇唔明就當無用，十個監控位，就cut八個，效率馬上提升五倍咁話。這些公司以為自己好醒，其實係豬頭丙。佢哋以為由Tech帶Fin，行業改變會快到噴汁，但其實所謂效率提升，是犧牲了風險管理質素，無事唔多覺，有事好大鑊。
FinTech同TechFin我都支持。我相信科技界有天才，但現時確實有些白癡，只懂透過輿論攻擊監管機構，話佢哋保守、偏袒既得利益者、窒礙科技發展、唔批牌。
另一邊廂，傳統金融機構當然也有天才。但很可惜，他們當中或許有自私之徒，自恃誰大誰惡誰正確，以種種理由借口，不全力參與金融基建。可恨的客觀事實，就是很多客戶依戀這些大金融機構的強大臂彎，面臨決擇時只能留在臂彎內，而放棄一個本來可以做到無障礙互通的高科技金融生態圈。
足本版請見「貼地風管」fb專頁
鄭發
本欄逢周一刊出
貼地風管 - 鄭發 舊文
來源 source: http://hk.finance.appledaily.com
