智取大市 - 晉佳 2018年12月7日
智取大市：藥業政治新棋局 - 晉佳
內地藥業利益集團，過往是不能撼動的，但在外圍亂局之際，難免要作出調節。資料圖片 適中字型 較大字型
內地藥業利益集團，過往屬不能撼動。新嘅藥品集中採購試點制度，令到中生製藥（1177）旗下正大天晴嘅產品恩替卡韋集採價格大降九成，可見一直以嚟內地藥價貴問題有幾誇張。倘若透過呢個制度，能夠將政治利益集團嚿餅，轉嫁到去人民手上嘅話，當然係人民之福，但要平衡政治利益嘅大前提下，冇咗一嚿餅，就要有另一嚿餅餵返先得。喺外圍亂局之際，習近平要穩住內憂，好難避免一餅換一餅作出妥協。
醫藥行業喺內地絕對係暴利行業，但收取暴利本身唔係上市公司。翻查2017年報，中生製藥嘅純利率只有14.7%，粗略地同地球藥業巨企輝瑞同拜耳比較，數字唔差太遠，睇唔出有暴利。不過，中生製藥嘅銷售及行政開支佔收入47%，遠高過輝瑞同拜耳嘅28.1%及37.5%，點解中生製藥相關開支咁高？中國政治潛規則，你懂的。如果傳統藥企唔能夠成為淘金對象，就會進入一個較長期低潮。
藥品集採試點當中，有60至70%同一類藥品，會由一間企業以價低者得形式全取，剩返由其他藥企爭。集採一定令平均藥價低咗，為免減低藥企開發新藥嘅意欲，就一定要出現補貼或扶持政策，呢個可能係新一嚿餅。鼓勵企業開發新藥事在必行，優質生科股睇嚟遲早受惠。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
