冰說聰明 - 青冰 2019年1月31日
冰說聰明：北水收爐 鐵塔小休 - 青冰
鐵塔股價一個月升三成。 適中字型 較大字型
昨天除了是期指結算，也是北水在過年前最後一個交易日，戰友可能會話，內地股市都死曬啦，乜仲會有錢來香港買貨咩，如果以整體市場而言，近月的確冇大量新北水流入，不過有隻股獲北水在過去一個月喪買，而又食正近期熱炒的5G概念，就係鐵塔（788）。
鐵塔加入港股通只係一個月多啲，但滬深兩邊加埋買咗約10億股，接近2.2%股權，淨流出只有1天，睇返佢首日加入港股通，股價只係1.28元，一個月就升了三成，以逾二千億市值的股票來講，的確係堅。
上星期鐵塔創新高後，開始有券商唱淡，理據係2月8日是上市半周年，禁售期完了，股東可沽貨。從小米（1810）開始，投資者似乎好驚禁售期完結帶來的沽壓，但就沒有去仔細分析兩者分別。新經濟股的玩法係有ABC輪融資，估值越谷越大之後上市，所以上市後沽出的誘因超大，人哋成本超低，套現好正常吖，小米如是，美團（3690）亦如是。
反觀鐵塔，上市時的十個基石投資者，包括淘寶、中石油、工行、上海汽車及高瓴基金等中資，斷估這些股東唔敢搞串5G個派對倒阿爺米吧，屬於老外的基金有三個，揸最多的是OZ Funds，有18億股。別忘記個個都係上市價1.26元買的，現價有三成利潤，係幾吸引嘅，但同新經濟股那些一沽就執幾倍，不能相提並論，沽貨誘因自然較低。
現時鐵塔是富時中國指數、MSCI及國指的成份股，以其市值及代表性，下一個目標豈不是染藍？不過就勸戰友不要多想喇，因為恒指公司有一個合資格納入恒指的候選H股名單，鐵塔暫未上榜，皆因股本中仍有非上市的內資股。唔染藍唔代表無前途嘅，但主要買家北水昨天已收爐，少咗一條大水喉，恐怕要到2月11日阿爺開工時才會再有朝氣了。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com
