優品乾炒點拆局
2019年01月15日
外圍焦點昨日由中美轉移至英國即將表決的脫歐公投。由於脫歐公投未知結果，講到尾倫敦都係國際金融中心，若然有黑天鵝出現，對市場都有影響，所以有點觀望氣氛。港股喺六連升後，終於出現像樣回吐。
英國國會將就脫歐協議進行投票，最理想結果係
文翠珊政府方案獲得通過。若然過關，往後仲有大量工作要做，任何政策都要提防魔鬼在細節中，但有協議總好過無協議，至少現階段算是軟著陸。若然協議方案不獲通過，就會出現兩個情況，就是在無協議下硬脫歐，又或者再次進行公投。
脫歐表決前唞一唞
對英國選民而言，硬脫歐引起大量不明朗，經濟有可能插水，是不願接受的選擇，這從民調可以反映出來。至於進行第二次公投，目前係在野黨大力推動的方向，但過半選民已經就是否脫歐投過票，若然再投票，等如得罪大部份支持脫歐選民，對執政黨而言後果相當嚴重，必須極力避免，就算保守黨內有人想攞文翠珊命，又或者想留歐，都不能不考慮背後的嚴重代價。
陸羽仁同有喺歐洲做大生意的猛人傾偈，他認為現階段正路結果，仍然係議案獲得通過，硬脫歐同公投都屬冷門結果。若然議案爆冷無法通過，保守黨仍極力推向硬脫歐，最後會否再公投，就要看在野黨如何進攻同選民有何反應。猛人話，無協議會引發大量不明朗因素，在野黨當然希望愈亂愈好，執政黨議員就算同文翠珊有分歧，都不能不考慮後果，估計有相當一部份議員投棄權票，等議案「側側膊」通過。
大市焦點唔多，交投隨即回落。大市早段曾挫471點，低見26195點，為全日低位，恒指收報26298點，挫368點；國指收報10292點，跌162點，成交跌至737億元。騰訊(700) 之前反彈幅度大，回調單日就挫2.8%，收報321.8元；總部在英國的滙控(005) 則跌1.3%，收報64.55元。
個股方面，高盛發報告，將聯想(992) 評級由「中性」上調至「買入」，相信盈利去年已見底，聯想逆市造好，最高升至5.78元，創超過一個月高，收升5.3%，報5.73元。新經濟股個別受壓，內地有報道指，美團點評(3690) 外賣涉嫌不正當競爭，遭工商部門立案調查，拖累股價一度跌至42.95元，收報43.9元，仍跌3.5%。該報道指，海南美團要求商家「二選一」，涉嫌不正當競爭，引發內地多方關注。海口市工商局已對營運美團外賣的北京三快科技海口分公司，就涉嫌不正當競爭行為進行立案調查。小米(1810) 遭里昂下調目標價，股價收跌3.1%，報10.02元；閱文(772) 跌4.9%，報35.25元；平安好醫生(1833) 跌4.4%，報29.15元。
指數回調，但氣氛唔算太壞，於是個股有炒作，半新股優品360(2360) 收集兩日後，股價突然抽升，勁飆43%，收報1.6元，比招股價1元急升近67%。優品急升，有中環茶友心癢難搔，仲問優品咁炒作，是否可以炒落後買隻CEC(759) ，該股昨日都急升8%，收報0.68元。
CEC同優品都係做零食生意。在CEC屬下的759業績不理想時，優品老闆林子峰曾豪言有意以10億元收購，其後他多番澄清。這次優品招股集資近3億元，計劃在未來四年新開76間分店。現時優品360共有85間零售店舖，香港七大休閒食品零售商市佔率則為87.6%，優品360以21.6%排名第二，與排名第一的零售商相差18.1個百分點。優品360行政總裁許志群表示，未來五年香港休閒食品市場規模有18億元增長空間，優品360將循序漸進，第一步做好實體店業務，雖然時興O2O(網上到實體店)營銷模式。
炒同類股要留神
從優品基本業務睇，未來分店擴張數量唔算太快。若然招股價係合理甚至略為偏低，雖然可以升一啲，但概念上唔存在大幅攀升條件。要留意的是集團招股時，正值市況淡靜，優品並無吸引到大量孖展客，最後香港公開發售部份錄得超額認購約9.92倍，一手2000股，中籤率30%，認購15手才穩奪一手。上周五公司掛牌，股價高見每股1.28元，收報1.17元，較最終發售價每股1元高17%，總成交量達至約1.77億股，總成交金額逾2.05億元。從招股結果同首日表現，由於超額數目唔多，貨源比較容易集中，加上首日升幅不俗，以近日新股表現，可能好多散戶都已開心食胡，令市場股份更多集中在強者手中，令股價一撩就爆上。
好似呢類半新股，表現往往同基本因素無關，所以係高風險高回報遊戲。由於炒起上嚟主要睇市場供求，所以同類股份好難相比，即係話熱錢若然要炒優品，不等如要炒其他零食股，因為大家貨源分佈唔同。玩呢類股份唔能夠太認真，只能夠順風駛?，要食定暈浪丸，預咗止蝕位，先至好走上去企圖坐順風車。
陸羽仁
金融High Tea 舊文
來源 source: http://hdfin.stheadline.com
