【魚樂無窮】咬緊牙關繼續砌（唐牛）
指數稍回吐，個股繼續炒到飛起，戰友們已經講緊牛四、牛五，氣氛異常高漲，同一時間，其實肉體及精神狀態均非常疲累。以自己為例，開市時段不停搵嘢炒，腦汁少啲都唔掂；收市後又要寫專欄還稿債，晚上更要喪睇通告執雞精文，同大家開心share，為第二日開市做準備。
辛苦還辛苦，難得市旺有嘢炒，點都要咬緊牙關繼續砌，好天斬埋落雨柴！
大麻概念股美瑞健康（2327）再有新動作，旗下工業大麻業務平台雲南漢素二期工程項目漢盟製藥，於周二正式舉辦動工儀式，佔地面積54畝，建設規模5.8萬平方米，年處理工業大麻花葉能力為2,000噸（可擴大至3,000噸），將成為全球規模最大的工業大麻提取、加工企業之一，預計2019年底建成投產。通告還有一大堆資訊，包括甚麼食品保健安全呀、美國專利獲批呀，有時間自己上港交所（388）網站睇。
最後還是要睇走勢，周三大成交一棍打穿高位，成功將1月底的蟹貨吸收，氣勢逼人，昨日縮成交整固，只要守住0.45元水平，有望再向高位進發，自己睇位做人吧，通告有update再同大家報道。
唐牛fb專頁
http://www.fb.com/tongcow88
魚樂無窮 - 唐牛 舊文
來源 source: http://hk.finance.yahoo.com
