智取大市 - 晉佳 2019年2月15日
智取大市：有資金有偽牛市 - 晉佳
大陸無乜保留咁放水，中國投資者即使心底裏不信，都炒咗先算，仲要炒到鬼咁狼死。 資料圖片 適中字型 較大字型
港股升到呢一刻，有啲攰攰地，但升股數目仍有700隻以上，個股咪又係繼續炒，炒股不炒市唔知玩到幾時。
大陸無乜保留式放水，經濟究竟谷唔谷得起，都要事後先知，就當佢可以令經濟短暫ok一下。
喺經濟差嘅時候，股市升，個個都半信半疑，亦有人睇死經濟；但當經濟真係出現虛火之時，就自然有人相信經濟真正復蘇，最終憧憬幻滅，就係反彈市、短牛市，反彈定短牛視乎資金流而定。如果憧憬實現，就好似03年至07年港股大升市一樣咁勁。
不過，即使當憧憬不能實現，由「睇死經濟」反映到「真正復蘇」嘅預期，其實股市有好大空間去波動，最緊要寫到個古仔有大把人信。講要寫呢種古仔，中國同美國都肯定係高手，至於中國投資者更加係最跟風嘅投資者，心底裏不信，都炒咗先算，仲要炒到鬼咁狼死。而更重要係，中美呢兩個國家𠵱家都想製造出呢種預期出來，資金，未來似乎不缺。如果話嚟緊有牛市，倒不如相信有可能係偽牛市。
偽牛市嘅終點，通常係經濟復蘇、健康增長呢啲情況都反映喺市場預期之中。終點之前，過程難料，中途亦會有好多熊市未完、經濟衰退危機嘅小恐慌不停打擊你。呢一刻升咗唔少，指數超買，周期股有一定升幅的，暫時唔理住了。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
