貼地風管 - 鄭發 2019年2月25日
貼地風管：工作不能忽略Time Value - 鄭發
好多打工仔不是懶惰或能力不足，而是錯在忽略time value，結果工作上事倍功半。 資料圖片 適中字型 較大字型
感謝《蘋果日報》過去五個月畀個角落我貼文，這是我在《蘋果》最後一篇，想把財務分析的一個重要概念應用到工作上。
財務分析常常講 Present Value，但Present Value以利率為基礎，較難廣泛應用。因此，請容我不太嚴謹，改用Time Value來演繹。
Time Value這概念連小學生都明白，因為他們懂 time"s up, pens down。一場考試12點夠鐘，你放低筆，份卷可能值80分，但如果你過了鐘30秒都唔肯放低筆，被取消資格，份卷就係零分。這30秒的time value負值極高，正常人唔會博！但很奇怪，學生時懂的事，入職場後卻忽略了！
老闆開會前30分鐘急call，要攞幾粒數開會用。同事唔記得老闆要時間消化啲數，以為真係有30分鐘時間，慢慢整靚個表，其實pens down咗好耐，老闆心裏正在爆粗！有些人醒過龍，老闆叫當天交貨，佢check到老闆第二日下午開會用，於是又好盡責咁做到淩晨，翌日一早甚至中午才交！老闆唯有以後把deadline定得再早些，造成惡性循環。
必須強調，九成以上這些例子，絕非同事懶惰或能力不足，而是錯在忽略time value。我建議三項原則：
1.老闆畀幾多時間你做嘢，就預咗你交乜嘢質量嘅貨，輸時間肯定大鑊過輸質量；
2.斷捨離：好多人都喜歡把自己找到的資料全數寫進報告，老闆要的資料卻被其他資料埋葬。記住資料如衣服，唔啱身的話就要丟掉。
3.目的、時限不能變，只能在其他地方遷就。我有兩個常用方法：大膽假設（假設了就不需要花時間找答案）；改目標唔改目的 （好多時目的只是要射中靶，但老闆唔覺意定下目標要射中紅心，我射中靶就照交貨，通常都OK）。
最後分享一個實例，二十年前參加培訓活動有個遊戲，每組要在三分鐘內用一把尺、一卷膠紙，和其他材料保護一隻蛋，讓它從高處跌落地都不會爛。我唔諗，馬上用把尺墊住隻蛋，然後用曬成卷膠紙包咗隻蛋幾十層，好肉酸、但成功！其他組別苦思如何用盡所有材料靚靚地保護隻蛋，三分鐘後，佢哋諗嘢個樣好有型、但失敗！
足本版請見「貼地風管」Facebook專頁
鄭發
本欄逢周一刊出
貼地風管 - 鄭發 舊文
來源 source: http://hk.finance.appledaily.com
