中國玩牛市
2019年02月25日
上周五港股拗腰收升，創七個月新高，恒指以全日高位收市，收報28816點，升186點。當日大市有得升，全賴A股帶動，恒指低開150點，其後反覆下跌199點，之後傳出中美貿易談判有好消息，中午跌幅收窄至84點，午後內地上證指數重上2800點
，帶動港股尾市升幅擴大，收市倒升0.7%。上證指數收升1.9%，報2804點。
中美原定喺上周五結束呢輪貿易談判，美國總統特朗普喺白宮接見中國副總理劉鶴，國家主席習近平致函特朗普，傳達樂觀信息，希望中美雙方加倍努力達成貿易協議。向來說話誇張兼樂觀嘅特朗普，今次嘅回應卻不慍不火，話雖然中美關係好好，但唔知最後會唔會有協議。不過，佢確認會喺3月底同到訪美國嘅習近平會面。特朗普呢個反常評論，令美股一度回吐，後嚟傳出中美雙方會延長呢輪貿易談判兩日去到噚日，令市場覺得雙方達成貿易協議在望，美股反彈向上，杜指收市升181點。
談判延長 美股造好
現實啲睇，美國貿易代表萊特希澤講法比較靠譜，佢話中美貿易談判向前推進，但仍有幾個重要關卡要跨過。可以估計，雙方應該有機會達成協議，但係唔可以話所有問題已經傾掂數。如果中美最後反枱，相信中港美股市都會玩完，今年以來升幅將會全部蒸發，但中美較大機會達成貿易協議，究竟幾地股市狀況又會點樣呢？
相對而言，內地股市應該會好啲。《彭博》睇圖論市，上星期四已作出提示，話中國創業板指數已經到咗牛市門口，中國創業板指數當日一度升3.1%，升穿1450點，較舊年10月低位升咗20%，呢個就係《彭博》所指嘅牛市門檻。中國創業板指數雖然上周四先升後回，翌日隨內地股市大升，收報1456點，升幅3.1%，正式踏入牛市門檻。上證指數就由舊年11月低位2440點，反彈至O依家嘅2804點，較低位大升14.9%，未夠入牛市嘅20%技術水平，但大方向都係向牛市進發。
證券股升 中概大漲
近排內地股市走勢較強，市場議論紛紛，話中國牛市已經到來。喺香港同美國上市嘅中國股票，亦反映咗呢種牛市衝動。香港上市嘅內地證券股上周五勁升，中國銀河(6881) 升9%，報5.39元；招商證券(6099) 升8.6%，報12.6元；光大證券(6178) 升8.6%，報8.5元。內地證券股普遍大升7至8%，反映市場炒作中國股市會再度興旺，進入牛市。
內地股市呢種蠢動，反映喺美國上市嘅中國概念股。熱門中概股上周五喺美國大漲，影視股愛奇藝收漲22%，創IPO以來最大單日漲幅；虎牙收漲12%；迅雷漲逾10%；搜狗漲逾8%；趣頭條、嗶哩嗶哩都漲逾7%。一啲較細嘅中概網貸股同樣升幅驚人，聖盈信漲逾39%；宜人貸漲逾13%。中概教育類股都普遍上漲，流利說漲逾10%，紅黃藍漲逾9%。中概股喺美國集體大漲，好難話係個別股份因素所致，只能話係市場對中概股興趣大增。當然，熱炒中概股嘅，估計唔係美國投資者，而是中國炒家。佢哋利用內地股市牛氣，大幅炒高喺美國上市嘅中概股。
整體而言，睇好A股升幅多過港股都好正常，原因係內地股市舊年插水，咩政策底、技術底全部跌穿，上證指數跌到去2440點。今年1月2日，我嘅網誌文章用咗《否極泰來》為題，話內地同香港股市舊年跌咁多，今年應該有得炒，但當日港股大玩震倉，急插700點，我自然俾人鬧到「反肚」。其後中港股市反覆向上，確認咗否極泰來嘅格局。
中國股市上升，具備一定技術同基本因素條件。除咗技術上舊年跌得太多外，股市通常跑喺經濟半年之前，中國經濟舊年第四季明顯失速，中央今年開始大力出招扶持，比較樂觀嘅睇法，係預計中國經濟今年首季見底，悲觀一啲就喺第二季先見底。換言之，中國經濟最遲會喺第三季回復向上動力，股市早兩季開始炒上好合理。
換證監主席成升市契機
另外，講講前中國證監會主席劉士余被撤換嘅玄機。今年1月26日，中國證監會主席劉士余被調職到供銷合作社，由證監會一個咁大權力嘅部門，調到去供銷合作社，只能夠話係「燉冬菇」。當時好多人對劉士余嘅遭遇抱不平，我有一位直接認識劉士余嘅朋友，佢話劉士余係一名清官，曾經因為其他人嘅案件被查，進入中紀委大院，由於為官清廉，最後可以全身而退。如此一名清官，最終都係要調職，主要是因為朝中冇人，冇高層撐腰，所以要孭鑊離職。
但係我嘅看法有啲唔同，中國面對內外好大挑戰，股市係晴雨表，特別係舊年7月特朗普喺Twitter發帖，取笑中國股市大跌27%，美國股市就牛氣沖天，暗示唔怕同中國打貿易戰。中國股市反覆試底，甚至成為中美貿易談判一種阻力。股市就係咁，有時水清冇魚，用正道方式搞股市，希望扶正基本因素，等三、五年後重上正軌。呢種王道做法，有時不我待之歎。我覺得若然劉士余蠱惑一啲，喺舊年12月初中美兩國元首會面，傳出雙方有意達成貿易協議時，召集所有內地證券基金大戶開會，話畀佢哋聽股市只能炒上，唔能炒落，恐怕中國股市就會一哄而上，喺舊年12月就會啟動。
劉士余當然冇咁做，內地股市就繼續「死吓死吓」。一個月後，劉士余被調職，換上工商銀行董事長易會滿做中國證監會主席，唔知係咪「行運醫生醫病尾」，定係易會滿識使出上述招數。易會滿一走馬上任，股市喺2月就重拾生氣，市場上仲傳出中國牛市重臨講法，估計係有人刻意宣傳。眼見為實，股民見到股市上升，就會相信牛市到來，唔會理會背後原因。中國股市上升，客觀上會增加中國同美國談判嘅底氣。
追入A股 博走一轉
總括而言，我估中國股市的確有上升條件，雖然唔可以否定有人為因素，但短期已形成上升趨勢，除非中美反枱爆煲，否則可以繼續走一轉，內地股市甚至比港股睇高一線。無論如何，唔好對股市睇得太好，特別係港股，因為經濟上挑戰好多，加上港股升幅唔細，現價追入風險開始增加。如果你覺得手上嘅貨唔多，又想追落後嘅話，可以考慮買內地股市指數，贏面反而會較大。
安碩A50中國基金(2823) 舊年1月高位係17.5元，上周五升1.4%，收報13.46元，較高位仍相差30%。舊年2月，上證指數高位為3574點，現時為2804點，距離高位仍有27.5%差距。安碩A50同高位價差更大，換言之走勢略為落後於上證綜數。我建議可以分兩注買入安碩A50，現價一注，低3%第二注，入齊博升20%，穩陣啲就定10%止蝕，以10%博20%，都有一定值博率。
陸羽仁
金融High Tea 舊文
來源 source: http://hdfin.stheadline.com
