豬年炒放水
2019年02月11日
港股上周五豬年春節假後開市，由於美國總統特朗普宣佈中美峰會將會推遲舉行，市場擔心貿易談判觸礁，港股低開282點後，隨即急跌456點，低見27534點，但開市無耐已經係全日低位，其後不斷反覆向上，半日已收復大部份失地，跌幅收窄至135點，
午後更一度倒升18點，最後微跌43點收市，報27946點。
如果睇收市，港股豬年開唔到紅盤，但如果睇走勢，單日走勢可以話係相當硬淨。內地還放緊年假，只有香港開市，要抽高抑或插低，純粹由大戶話事，他們想買就升，想沽就跌。從消息嚟睇，中美貿易談判感覺唔係咁良好，至少顯示中美仲有好多實質問題未解決。中美貿易代表喺今日起喺中國再開一次會，屆時都未必能解決。
周五反彈 大市底強
另外，估計特朗普都唔想中美領導人見面撞正美朝峰會，所以就推遲中美峰會。總括而言，呢個唔係利好消息，雖然唔係太壞，但由於冇內地市頂住，港股處於一個自由飛行狀態，大戶要趁壞消息插低大市，要大市跌700至800點都唔出奇。但是大市走勢啱啱相反，低開之後逐步炒上，只能夠話大戶都唔想港股跌。
正如我早前所講嘅新曆年過後，大戶似乎做咗好倉，但散戶入市情緒未濃，大市雖然升咗3000點，仍然派唔到貨，因此暫時係一個「大戶湯底睇好」嘅狀況，港股每次回吐500點左右就會反彈，唔似舊年底隨時大跌一、兩千點嘅弱勢。以走勢論港股今年開局至今，大市底子仍然較強。
目前一般估計，中美上半年可以達成貿易協議，只係期間會有波折。與此同時，中國經濟仲處於下滑狀況，財新公佈嘅12月中國採購經理指數(PMI)，顯示中國經濟特別係民企部份仍然下滑，相信中央嘅托市措施會陸續有嚟。
人仔轉強 方便減息
過年前同中環茶友團年，席間講到人民幣走勢。舊年11月美國中期選舉前夕，離岸人民幣喺11月13日跌至6.9697低位，距離七算只有一步之遙；到12月2日，中美峰會後傳出樂觀氣氛，人民幣出現第一波反彈，12月4日回升至6.8211，之後反覆上衝，喺1月30日升穿6.7水平，高見6.697。
中國副總理劉鶴喺1月28至31日訪美進行貿易談判，雙方未有達成任何協議，人民幣略為回軟，最新報6.78左右。人民幣走勢既與中美貿易談判掛鈎，亦都受中央調整人民幣中間價影響。中環茶友估計，中央目標主要係想托高人民幣到6.5至6.6水平，創造減息空間。如果人民幣能夠喺減息後回吐，跌至6.8而唔穿7算，依然係一個比較舒服嘅水位。所以佢相信，人民幣上升，除咗受中美貿易談判利好氣氛影響，亦有中央主觀因素使然。
對於中央會唔會快速減息，有兩派意見。巴克萊銀行經濟學家早前表示，中國經濟數據迅速惡化，將促使中國央行最快喺農曆假期前2月1日減息，但人行結果冇咁做。值得注意嘅係，巴克萊銀行喺2014年彭博調查中，唯一估中人行喺當年減息嘅機構。巴克萊銀行估計，人行今年會喺第一同第二季，分別兩次各減息0.25厘，原因係美國聯儲局已經採取更有「耐心」嘅加息立場，顯示美國加息周期快將停止，人民幣喺一月以來嘅強勁表現，已經消除中國全面減息，會令人民幣匯價急跌疑慮。
另外，花旗投資同樣認為，美國聯儲局態度轉鴿，人行即將減息。花旗認為，12月中國PMI跌破50，進入萎縮區域，中國第四季經濟增長放緩至6.4%，係2010年以來首次低過6.5%，中國通脹已開始放緩，好快就會出現通貨緊縮。雖然人行致力發明新嘅政策工具，確保寬鬆政策能夠有針對性實施，但目前效果有限。所以花旗認為，官方會直接減息，改變貸款同存款利率。由於人民幣匯率穩定同資本管制，可以減輕中國減息令資本外流嘅憂慮。再者，美國聯儲局嘅鴿派立場，好可能會消除人民銀行減息嘅最後疑慮，花旗因而認為中國央行將會減息。
美國轉鴿 創造空間
不過，內地都有一啲反對減息聲音，例如話中國目前一年期存款低過1.5厘，再減息的話，將會影響存款總額。同時，中國利率未轉向市場化，利用貸款同存款利率管理經濟，效果可能會適得其反。
總括而言，我覺得美國聯儲局態度轉鴿，中國喺第一季有相當機會減息，減息未必即時有好大作用，但係象徵意義就相當大，係一個明顯寬鬆政策，會觸發市場對減息預期，預計今年仍會再減息，令市場投資意欲增加。如果減息的話，對包括股市在內嘅投資市場會有較大刺激。若問上半年有咩可以炒，主題應該係炒中國放水。
講完大環境講吓個股。每年開局煤氣(003) 都會向好。有朋友係投資專家，佢媽媽雖然已屆93歲高齡，但仍然精神奕奕，炒股不絕，我同朋友媽媽拜年，老太太好自豪咁話，「阿仔經常叫我唔好買煤氣，但我照買，成為我最賺錢股票之一。」朋友喺旁邊聽住，為之吹脹，煤氣32倍市盈率，但散戶照買，股價照升，你叫人唔買，佢就同你作對啦。
煤氣股價 愈貴愈有
上周五煤氣創出8月以來新高，收報17.34元，逆市升1.5%。好多散戶經常問我買煤氣好唔好，我都會股神巴菲特上身，話煤氣市盈率達32.4倍，股息率僅1.8厘；如果買股長揸，點解唔買市盈率得16.3倍，股息率有3.2厘嘅中電(002) 呢？不過，扮股神係冇好下場的，煤氣年初走勢通常都好好。股民無懼32倍市盈率咁貴，繼續追入，令貴者更貴，愈升愈有。道理很簡單，煤氣除咗派息，每年仲會十送一紅股。送紅股這招本來係一種無中生有嘅手法，十股變成十一股，每股盈利、派息都會攤薄，股東實質上攤佔嘅權益冇變，但「橋唔怕舊，最緊要受」，股民對市盈率、股息率都冇咩感覺，只對股價有感覺。派送完之後，一年過去，股價又會上返嚟，甚至到更高水平。散戶嘅感覺係，送出嘅紅股係真實，平白賺咗10%，煤氣就是憑呢招長久跑贏中電，以市盈率計，仲跑贏中電成倍。我又唔明中電，點解唔照辦煮碗送紅股呢？
炒送紅股 還有恒地
我O依家學精咗，唔再唱衰煤氣，有人問我，我會話可以策略性購買。煤氣喺舊年3月20日公佈末期業績，6月8日除淨，喺6月22日派發。喺公佈業績後、除淨之前，煤氣繼續炒上。到除淨之後，股價回吐一兩個月左右，之後雖然再上，但到10月左右再度回落，到11月之後再向上。由此可見，煤氣嘅上升周期係每年10月至翌年5月左右，而回落周期在喺除淨後大約三至六個月。因此，玩煤氣方法係炒波幅，喺年底時買，到宣佈業績、派息送紅股後，見高位就沽，千祈唔好喺送紅股除淨前一兩日買入，因為除淨之後嘅一個月，都係股價嘅下跌期。
唔想買32倍市盈率呢類高危股票，其實可以考慮同系持有大量煤氣股份嘅恒地(012) ，雖然股份類型完全唔同，煤氣係公用股，恒地係地產股。恒地勝在市盈率正常，市盈率6.5倍，息率都有3.5厘，比較同類地產股新地(016) ，市盈率7.6倍、息率都係3.5厘，新地市盈率更高。新地舊年10月見低位99.5元後，現價131.2元，差唔多升至全年高位132.2元，但係恒地就冇升得咁多。恒地舊年10月見36.15元低位，現價44.75元，仍較一年高位48元為低。我之前喺恒地股價低迷時，曾經建議大家可以買入，主要係除咗炒地產股反彈，仲可以炒恒地繼續十送一。
恒地舊年3月21日公佈末期業績，繼續十送一紅股，喺6月5日除淨後，股價大幅下插。可以話，除淨之前仲係安全期，千祈唔好等除淨日前買入博送紅股，反而應該早幾個月買入，喺宣佈業績後，炒上之後炒波幅走人。睇走勢，港股可能仲有兩、三個月可以玩，利用業績期走一轉，豬年應該可以搵番餐「晏仔」。
陸羽仁
金融High Tea 舊文
來源 source: http://hdfin.stheadline.com
