大棋局 - Mr. Tregunter 2019年2月12日
大棋局：中美貿戰好戲在後頭 - Mr. Tregunter
貿易戰估計會斬件收場，只有部份項目傾得成。 適中字型 較大字型
無論特朗普定習近平，此刻都需要貿易戰和談結局。三國時代，郤正評價薑維時講過一句話：「凡人之談，常譽成毀敗，扶高抑下。」意思是人通常以結果倒睇前因。特朗普上任後腳踢四方，如果最後貿易戰未能傾妥，美國經濟又受損，自然會有一種聲音鬧特朗普搞咁多嘢得個吉，而非看待其戰略判斷是否正確。習近平面對的情況亦如是。
貿易戰估計會斬件收場。即美國要求中國改革的事項，就算同一範疇內，最終只有部份傾得成，關鍵在錢搞唔搞得掂。美國的要求可概括為五大範疇，第一為消除貿易赤字，相信會完全解決，中國會大手買美國頁岩油、天然氣、大豆等等。
第二範疇是知識產權。產權可以買賣，偷即係唔畀錢。只要中國畀錢，落實保障美國公司的知識產權，這部份可以傾得成；但美國唔賣的技術，中國唔可以再用各種方法奪取，這部份文書協議其實約束力不大，就算表面傾得成，日後亦會再起風波。
第三範疇是貨幣政策。傾各種協議，如果中國一個屈尾十好似94年將人民幣貶值四成就白做，所以貨幣政策問題也就係人民幣唔好貶值，其次為開放資金進出。早期當然可以，但當中國貿易順差減少，外滙漸少，人民幣就算相對封閉，其價值亦係市場話事。就像以前人民幣官方一個價，黑市會是另一個價。
第四範疇係消除不公平貿易，開放市場。所謂不公平貿易，例如外資在中國公司的持股比例、強逼外資以技術轉移換取市場准入等。外資持股比例，相信會以負面清單形式陸續開放不同行業；強逼技術轉移，有得傾，但唔代表會解決。中國可以承諾不強逼技術轉移，但用其他合法藉口否決外資合營，等外資自己識趣用技術交換。到時話係外資自己提出，冇強逼。
第五範疇是國企及政府補貼。古時封邑食祿，現代封企食祿，國企其實就係一方諸侯。諸侯之其一作用為捍衞皇權，國企市場化等於削藩，皇權掌控力下降，所以現時冇可能改；政府補貼，部份比較閒的業務有得傾，但像中國製造2025唔會有得傾。
上述五個範疇由易到難，貿易戰一旦斬件收場，代表錢能解決的都做了，剩下為錢不能解決的，這部份先係戲肉。去年11月估計股市醞釀大反彈，結果時間錯了，恒指打雙底再上。反彈好少超過跌幅一半，即28500差唔多，宜準備走人。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com
