金手指 - 孫柏文 2019年4月23日
馬上成為壹會員
會員註冊/登入
金手指：印鈔下三大妖孽 - 孫柏文
Tesla 適中字型 較大字型
上周由印度傳來第二大航空公司Jet Airways財困即時停飛，令孫柏文諗到印鈔引起嘅扭曲，誕下嘅妖孽，喺美帝由舊年初至今都未停過嘅收水QT下，仲會陸續有來。
如果問我最能代表印鈔時代，就有呢三大妖孽企業。第一，AirAsia。佢哋辦廉航，我都搭過好多次，增長速度快到已成Airbus單一最大客戶，飛機都買得特平。不過佢哋乜都蝕，由機票到載行李、由賣餐到免稅品，唯一賺錢方法係賣斷飛機畀投資者，跟住租番轉頭，租金就成飛機買家嘅固定回報。問題係要不斷有新飛機賣先得，所以要不斷割喉式競爭搶生意，其他航空公司點算呢？
第二，Tesla。由向買家保證回購，到瘋狂、冇腦咁起叉電站，佢哋係科技獨角獸嘅代表，即嗰啲收4.99元賣個5蚊硬幣畀你嘅business model。谷大營業額後，就繼續融資、隊佢上市。
第三，海航。當年佢哋引起「大陸買起香港」恐慌時，我都講過話期待他朝佢要賤價嘔返啲嘢出來。真係發生緊。之前被無辜害到雞毛鴨血嘅對手，應該會有大反擊之機。齋睇國泰（293）已知。
相信大家心裏都有呢啲印鈔下先有嘅妖孽例子，幫襯可以，不過千祈唔好借錢，或信佢哋未來先做嘅保證。要保護自己啊。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com
