大棋局 - Mr. Tregunter 2019年4月23日
馬上成為壹會員
會員註冊/登入
大棋局：石油震盪勢將重臨 - Mr. Tregunter
美國過去係原油入口大國，自開發頁岩油後，入口越來越少。資料圖片 適中字型 較大字型
星期一布蘭特原油（Brent）同WTI原油都突然急升約3%。事緣星期日《華盛頓郵報》報道，美國國務院將於當地時間4月22日宣佈制裁所有進口伊朗原油的國家。特朗普舊年退出伊朗與六國的核協議後，隨即於11月再次制裁伊朗，與伊朗買原油的國家都會被制裁。當時有個緩衝期，豁免中國、台灣、印度、日本、南韓、土耳其、意大利、希臘8個國家及地區，只要緩衝期內買少些伊朗原油就無事。豁免期限至今年5月2日。
綜合近年數據，現時國際原油交易的每日供需缺口約100萬桶。即是話每日只要市場上多100萬桶油，油價就會跌；少100萬桶，油價就會升。伊朗現時每日出口200萬桶油，被制裁後市場供應縮減，如美國真是再次制裁，伊朗出口份額會變0；OPEC今年初宣佈每日減產120萬桶油，協議6月到期。
伊朗同OPEC產量都縮減，油價並無爆升，有三個原因。其一，部份國家口頭話減產，有冇偷偷趁人哋減產自己增產賺多啲，其實很有可能；其二，美國過去係原油入口大國，自開發頁岩油後，入口越來越少，估計2020年將成為原油淨出口國；其三，科技發展，生活形態改變，全球原油使用量有向下趨勢。
由現時到2020年，只剩一年。過去美國生產的原油自己都唔夠用，大部份靠入口。但2020年開始美國要出口，要在國際原油市場插旗，第一件事要做嘅，就係要原本食呢口飯的老叔父讓位出嚟。由於原油出口國大部份收入靠賣油，政府財政預算亦靠賣油，好景時各產油國政府要油價賣50至100美元先財政平衡。油價大插，赤字，產油國要晾價被迫減產。一減產，就係插旗空隙。
伊朗、委內瑞拉兩大產油國，美國係明做佢；OPEC以減產方式掠價，特朗普揚言可能出動NOPEC法案，以反壟斷法制裁之；沙特反拋窒，美國夠薑玩NOPEC以後石油就唔用美元交易；有消息指美國制裁伊朗後，國務卿蓬佩奧又會宣佈彌補措施益沙地及阿聯酋。
每一個地方，都有老叔父坐枱聯成一塊，後起或外來之人想該處搵食極難。其中一個方法，係將聯成一塊打碎，帶頭製造分化，各個擊破，係為咗畀後面長驅直進。國際原油市場，只係社會上一個比較大的縮影。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com
