【異動尋寶】港股打巷戰 最佳應戰策略係…（魏力）
美股強、阿爺弱，夾在中間的港股，自然「兩邊不是人」，整個4月都困在窄range打巷戰，動彈不得。阿爺弱因為驚收水，理由相當牽強，打個比喻：醫生剛剛才把病人由鬼門關救出，有返心跳脈搏，呢個時候，醫生當然唔會再打強心針，唔會再電你心口，改為
觀察病人情況是否穩定下來，目前就係呢個情況。但唔再打強心針，係咪等於連鹽水都唔使吊，即刻推佢出普通病房，由佢自己康復？諗嚇都知唔會係咁。
咁點解中港股都係咁弱？好簡單，因為上季升得太急、太多，要時間回氣，係咁多。當然，你揸盈富基金(2800)同揸二三線、股仔，對悶市個反應一定好大分別，重磅股橫行，但不少二三線熱炒股，已紛紛由高位回15%至20%，唔好彩高位接咗貨，肯定已經牙痛咁聲，嗌生嗌死咁款。
板塊方面，炒得非常個別，係5G、豬肉股相對強一些，昨已另文分析，不贅。揸住其他的話，有好消息都係捱沽，一中伏就大大鑊。舉個例，美國取消制裁伊朗的豁免，油價即挾逾2%，揸三桶油、油服股以為有運行？無確，但只限高開嗰一嚇，之後一路向下派，貫徹A股近日作風—逢見好消息就出貨。
油價急升，最硬淨的中海油(883)埋單都係升1.5%，但受累的內地三大航空股，全線跌到嘔白泡，跌幅介乎6%至8%；國泰(293)跟隊3%，辛辛苦苦由1月建立的中期升軌，一下就打穿，sad。呢個例子話你知，港股市寬正持續轉弱，重磅股以外，只有極少數股份目前仍守在高位，因此戰友當務之急是收窄戰線，見破位就追嚇，見有好消息又博嚇，用呢隻打法應付目前個市，瓜多過菜。
傳統上第二季係難玩，特別係第一季已經大升，今季宜先作較壞的打算，預佢會「五窮六絕」，輕倉迎戰，真係咁好彩升破30300先追返，總好過在如此市況下被磨走本金同信心。
本人為證監會持牌人，未持有上述提及股份財務權益。
www.facebook.com/2012jason
異動尋寶 - 魏力 舊文
來源 source: http://hk.finance.yahoo.com
