操盤手札記 - 割柑人 2019年5月28日
馬上成為壹會員
會員註冊/登入
【操盤手劄記】入摩入富冇著數 - 割柑人
騰訊作為MSCI中國指數最重磅嘅股份，A股加碼入摩，騰訊受權重攤薄所累而捱沽。 資料圖片 適中字型 較大字型
中美爭奪經濟霸權，戰線由貿易擴至科技，華為成為砲灰。科技戰場，其一5G，其二AI，領軍AI嘅BAT隨時中彈。
BAT之中，百度同阿里巴巴喺美國上市，騰訊（700）則喺香港上市，更係恒指重磅股，有乜依鬱，港股攬炒。周一，喺A股加碼入摩前夕，作為MSCI中國指數最重磅嘅騰訊，更受權重攤薄所累下跌。騰訊已連跌8日，低位相對4月高位已回調兩成，熊蹤乍現。
A股加碼入摩，周二收市後生效，騰訊短期沽壓，周三可望紓緩。不過，今趟只係加碼入摩嘅第一步，8月同11月仲有兩步，到時騰訊又要捱沽。入摩之外，A股亦會入富。富時羅素剛於周末公佈A股入富名單，6月21日收市後生效，意味騰訊下月再有沽壓。
睇返個市，周一A股升1.4%，港股跌0.2%。恒指再創今輪跌浪新低，一旦確認失守雙底頸線27260，按舊年低位24540至今年高位30280計，回吐黃金比率61.8%，將見26733。後市反彈力弱，睇嚟5月會以大陰燭埋單，短線反彈阻力為上周四下跌裂口底部27523。
現時市況，只宜輕倉操作。出口股、科技股唔好掂住，民生消費股反而可吼。當中，快餐股大快活（052）股息率達5.3厘，具防守力。以賺錢能力計，三大本地快餐股中，截至舊年9月嘅中期業績，大快活純利率為7%，跑贏大家樂（341）嘅6%同翠華（1314）嘅2%。
不過，大快活中期少賺14%，皆因租金、人才培訓同發展開支增加；另外，5間新店3間未有貢獻。集團上半年已加價1%，管理層有信心下半年同店銷售有中單位數增長。據券商預測，大快活2019年度收入將放緩，但每股盈利仍將增長8%，不妨留意。
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com
