【魚樂無窮】做淡友的難處（唐牛）
港股欲彈不能，唔想倉位日日流血不止的，除了減磅套回現金外，想奪回主動權的戰友，更會透過淡倉出擊，希望可以逆市贏錢。大跌浪下做淡贏錢，理論上應該係easy job，但實際操作卻又是兩回事。
市面上最普遍的做淡工具，不外乎put輪及熊證，買賣快捷方便，豐儉
由人，不過前者受引伸波幅及時間值損耗影響，後者則有收回風險，如果下跌的時間及速度不似預期，隨時出現睇啱市但冇得贏的慘況。
直接沽空股票嘛，借貨成本不輕，市場普遍講緊最優惠利率（P）再加一個premium，下跌幅度若未能cover利息成本，又會空歡喜一場；更要留意唔係隻隻股票容許沽空，部份冷門股借貨亦有難度。
沽期指又如何？相對來說係最公平的做法，加上又有夜期市場，可以增添靈活度，但日炒夜炒好易精神分裂，如果你只睇淡個股不是大市，期指可能又唔啱你口味。
做好友可以買入股票慢慢坐，只要不是孖展，時間就是你朋友，但做淡坐貨成本隨著時間而增加，時間就是你敵人。簡言之，好友可以玩慢火煎魚，淡友嘛，只能夠速戰速決，market timing最重要！
註︰外遊關係，專欄暫停兩周，6月21日復常。
唐牛fb專頁
http://www.fb.com/tongcow88
魚樂無窮 - 唐牛 舊文
來源 source: http://hk.finance.yahoo.com
