金手指 - 孫柏文 2019年6月18日
【金手指】俄鋁小股東要團結 - 孫柏文
俄鋁本周四舉行股東會，香港小股東要團結，現場向管理層提出自己嘅要求。 資料圖片 適中字型 較大字型
禮拜四早上，俄鋁（486）將會喺半島酒店舉行股東會，孫柏文當然會出席。除咗代表自己嘅股權外，亦會揸住fan屎賜我嘅proxy入去乜叉都投反對。當日我會帶埋多件已印有「冇息派、冇計傾、Where"s Our Dividend？」嘅T恤，如果你同我有一樣嘅要求，就問我攞件T恤笠上身。俄鋁啲低級職員唔好諗住DQ我哋入場，我一定會申請司法覆核，void咗你個股東會。
講到俄鋁，見David Webb話美帝下一步會有如舊年對俄鋁咁，透過OFAC制裁大陸國企，包括喺香港上市嗰啲。點知彭博社嘅水皮撰稿員，居然將重點放喺「美國基金就要沽出手持嘅相關股票。」OMG，你有冇渣啲呀。如果係咁制裁，係講緊連幫你營運公司食堂嘅外判商，都要即時停業。唔好講話啲銀行全部要你閂戶口，你啲客戶都找唔到數畀你。如果唔係，連嗰啲同你繼續做生意嘅人，都會被制裁埋。
上周「一個月HIBOR」爆上海嘯後新高，曾淵倉博士話係因借港紙買美元賺息差嘅倉喺到拆倉，而唔係走資。我想問曾博士，如果買咗美元嘅港幣，轉番做港幣，港幣嘅貨幣供應唔係應該增加，銀行同業拆息應回落先係？我腦中嘅迷思未解前，我點都係信走資是HIBOR爆升的原因。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com
