鬆弛熊與金甲蟲
2019年07月05日
貿易戰陰霾暫時消散，全球投資市場焦點轉向歐盟大換班，當中歐洲央行行長由本來鴿派嘅吉拉德，換成更大鴿派拉加德，令全球貨幣政策好大機會變成「鬆弛熊」，同時喚醒更多「金甲蟲」。
美國特朗普早前狂鬧聯邦儲備局主席鮑威爾嘅利率政策，同時大讚
歐洲央行寬鬆政策，幫企業喺國際間加強競爭力，歐洲央行儼如變咗特朗普精神盟友。呢兩日歐盟領導層換位，原本喺國際貨幣基金組織(IMF)主持大局嘅拉加德，將會接任歐洲央行行長。拉加德之前評論中美貿易時，不斷強調全球經濟面臨風險，暗示一有風吹草動就要出手刺激，外界視佢喺貨幣政策上係大鴿派。由佢主管歐羅區利率政策，相信未來大方向係走向寬鬆，喺特朗普鼓吹同歐洲看齊下，市場猜測未來央行又會進入印銀紙時代。
憧憬印銀紙金價先升
未知市場係咪感受到放水日子可能重臨，稍為調整嘅金價再度彈升，金價持續上升，紐約期金升至六年多來最高。紐約期金連續第二日高收，以每盎司1420.9美元收市，為2013年5月中以來最高收市價，升12.9美元。金價周初喺高位回調，本來以為會跌深啲，結果去到1400美元邊緣又再彈上，創出幾年高位，金礦股暫時無法低吸。不過投資市場機會多的是，高追有機會密食，但風險亦都增加，想穩陣最好當然係保持耐性。
中環茶友話，金價拒絕調整，反映咗最近升勢，可能喚起一啲已經離場嘅金甲蟲注意力。舊年雖然地緣政治風險等因素對金價應該有利，但黃金無法發揮避險功能，但踏入今年，情況開始有改變，金價冉冉上升，部份原因可能係市場估計美元升勢接近尾聲，加上美國總統選舉開始，息口有回落跡象，銀根可能再度鬆弛，金甲蟲於是開始活躍。從走勢嚟睇，盎司金價現時支持位喺1360美元左右，但周初回調根本遠離呢個位就反彈，金甲蟲未有入貨機會。
陸羽仁之前講過，現時全球投資氣候逐漸被減息浪潮籠罩，喺股市方面，優質股同利率敏感股先升奪人。噚日仲有幾隻呢類公司好似港鐵(066) 同房託股造好，估計跟住就會炒落後，好似二線內房股同藥業股。喺特朗普連任大計中，股市好係重要一環，加上歐洲鬆弛熊上場，就算全球指數現在不算太低，估值甚至有點偏高，暫時睇都唔易出現大跌。
炒完優質股炒二線
七月份港股開局相對牛皮，美股隔晚創新高，但港股稍為高開就回落，主要係領升嘅強勢股回調，金融股等板塊又未跟得上。恒指收報28795點，跌59點；國企指數收報10913點，跌9點，成交金額724億元。日前創新高嘅中國平安(2318) 跌0.2%，收報96.35元；友邦保險(1299) 創新高後倒跌0.8%，收報86元。有負面消息嘅新城發展(1030) 再插11%，收報7.19元；中煙香港(6055) 更急挫28%，收報13.78元。被視為有防守性嘅燃氣股全線逆市向上，中國燃氣(384) 收升5.6%，報31.35元；華潤燃氣(1193) 升5.3%，報40元；港華燃氣(1083) 升2.7%，報5.95元；新奧能源(2688) 升5.7%，報81.25元。
新股方面，注重本地化麻將同啤牌遊戲嘅中國本地化流動棋牌遊戲開發商及運營商家鄉互動(3798) ，曾飆上高位2.64元，較招股價1.35元升近一倍，收報1.71元，較招股價仍升26.7%。
陸羽仁
金融High Tea - 陸羽仁 舊文
來源 source: http://hdfin.stheadline.com
