【大茶飯】Victor給你的啟示（青冰）
李澤鉅更多
香港政經局面如斯爛，投資氣氛低迷，今年的恆指在上周一度轉跌，如果戰友個倉已經見紅，亦屬正常，環境係差大家都知，但較弊嘅係，唔知今次要衰幾耐啊。大孖沙雖然齊聲譴責暴力，但講還講，究竟有冇看淡經濟，睇佢哋手影仍然係最實際。睇誠哥出手不嬲係
最有指標作用，但現在退咗休就頓失依靠，要問Victor點睇，難過登天，但長建(1038)剛公佈的業績，似乎看到端倪。
長建素來係穩健之選，亦係Victor哥用心經營的公司，盈利穩步上揚，雖然偶爾會有倒退，但派息從不倒退，這亦是Victor最引以自豪的，自豪到每年全年業績的第一版，都係話第幾多年股息增長，仲好有心機整埋個每年派息圖表畀你睇，咁又真係幾堅嘅，截至2018年財政年度，係連續22年派息增長，這22年來派息持平都冇呀。
長建在上月尾公佈半年業績，維持中期息在0.68元，市場為之錯愕，即時先沽為敬，上周更創52周新低。不過又公平啲講，只要末期息有增派，Victor哥下年仍然可以大聲講，連續23年派息增長嘅。翻查記錄，以中期息來講，上一次派息持平，要數到2003年，正是香港爆發沙氏之時，所以廿幾年來，中期息冇增長，只有2003年及今年。
究竟係咩驅使Victor哥唔增派息，係唔係覺得今次香港經濟會大鑊過沙氏，而預先作準備呢？記者朋友們可以幫手問嚇。如果以長建的業務分散程度來說，香港又未至於係舉足輕重，不過長建都算係黑仔喇，其餘重點的地區，係英國、澳洲及加拿大，英國有硬脫歐困擾，澳洲經濟亦唔見得好，當我哋見到人仔破七就好擔心H股，不妨又睇嚇英鎊及澳元，這兩年究竟跌了幾多，其實都會影響唔少在港上市的企業，長建相信就是其一。唔增派息係因為香港，還是擔心全球，相信Victor都唔會同我咃講，唯有再等下一個手影吧。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
