【異動尋寶】忽然有計傾 小心又係陷阱（魏力）
「政治市之下，分析股市的唯一目的，就是證實分析是無用的。」昨晚，中美貿戰忽然又話「有得傾」之後，魏力收到戰友傳來的這個訊息。唏噓，但是事實。
作為一位與中南海相距幾千公里的老散，你永遠唔知道班大帝幾時會通電話，更難理解雙方的盤算，就算畀你估
中最後的結果，但中間過山車式的市況，無定向喪心病狂的市場傳聞、消息，已足夠炒友破產三五七次。咁難炒都要炒的話，只能縮注去做，一縮注就注定無大錢贏，純粹保持手感、市感而已。
貿戰肉搏已夠煎熬，過去兩個月仲要被示威衝突洗版，數晚難以入眠，日間再要客觀、冷靜地出手，不受情緒影響決定，近乎是不可能的任務。少做少錯，不做不錯，雖然消極，但不失為自保良策。
呻咗幾段，都係入番正題。中美高官通完電話後，美方突然公佈，將手機、電腦、遊戲機、玩具等產品的進口關稅，暫緩至12月15日，其他產品則如期9月1日起徵稅。何解又有得傾，據特朗普twitter所講，係中方又再同意大量採購美國農產品，但阿爺反口覆舌、一拖再拖，早有前科，老特今番「畀次機會」，紓緩一下緊張氣氛，可短暫刺激一下個市。
不過，全球經濟同步下行，中美雙方經濟數據都轉弱，扮傾托嚇個市，無可厚非，要個市有較明顯反彈，美聯儲或需動真格，9 月份大刀闊斧減息，配合再買債放水，目前睇機會仍只是一半半。
操作上，大方向仍是逢高沽，而不是低吸；手持現金、黃金才是避險的理想之選。
www.facebook.com/2012jason
異動尋寶 - 魏力 舊文
來源 source: http://hk.finance.yahoo.com
