【大茶飯】支持深圳發展的概念股（青冰）
昨天戰友send來一個支持深圳發展的意見發佈，全名是「中共中央、國務院關於支持深圳建設中國特色社會主義先行示範區的意見」，個題都幾十字，全文就四千幾字，青冰反覆看過兩次，睇完之後，難免將這個支持，與近期香港發生的逆權運動作聯想，背後目的是否想取代香
港？有興趣的戰友可以看一次全文，再自行判斷。戰友或會覺得中央及國務院發文支持，都係膠吹而已，你睇咩一帶一路，雄安新區，最後也成爛攤子，仲話想取代香港，似乎係大想頭，都係嘅，最後都可能係唔成功，又或者需時廿年先OK，但作為炒股角度，無論個計劃幾爛，中央強力支持，都是一個值得留意的概念。
作為本港股民，每次見到一個地區的大發展，首先都是諗起房產，當日雄安都係先炒房產股的，而深控(0604)及深國(0152)這些老牌紅籌，一聽個名就知係深圳股，可能最先令市場留意。不過按萬科(2202)的2018年報，原來深圳萬科是去年此區域的銷售第一，再加上萬科的最大股東是深鐵集團，而又聽說深鐵跟大大關係密切，咁萬科都算係嫡系吧，前景應該更佳，不過又提返你，成份文幾千字，講咗好多行業，唯獨係冇提過房產，所以未必是整個意見的主調。
撇除很多膠吹的部分，有一些行業似乎係未來的重點，人工智能、高性能醫療機械、數字貨幣、移動支付、雲計算、大數據、數字文化及創意文化、綠色消費、教育，這些都是出現得較多的字詞。在深圳紮根的高科技公司極多，最強的當然就是騰訊(0700)啦，你睇返騰訊的業務，跟上面的關鍵詞，其實除了高性能醫療及教育外，全部都有份喎，究竟未來的發展重任，是否落在騰訊身上，拭目以待。
至於關鍵字中仲有邊啲個股係受惠，戰友亦可在專頁上分享嚇，因為青冰實在識唔曬咁多，行業啱而基地又在深圳的，可以秤先，如果懶嘅話，留意開市後本港及A股的升幅榜，再check嚇同深圳的關連性，或可搭嚇順風車。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
