【異動尋寶】彈散格局的四大理據（魏力）
市況混亂，消息滿天飛，最忌跟車太貼，大幅低開想追put，低位彈幾百又反手追call，自找麻煩，輸錢輸信心。前輩教落，炒股要望價，但最忌係齋望個價，忘記了big picture。
有睇魏力前日文章，應該已明白，目前的問題唔係減兩口息、放放水就解決得
了，貿易戰屬政治問題，但會帶來巨大經濟影響，而決定關稅的是白宮（即係特朗普），而不是聯儲局。所以鮑威爾同你、同我都一樣，只能被動地因應經濟狀況、市況去做反應。這是股市最恐懼的地方。
老特係咁嗌減息1息、兼重新印錢放水，並非因為經濟好差，而係為自己增加籌碼去玩政治、加關稅，順便托住個市，增加明年連任的機會。鮑威爾當然明白，亦在上週Jackson Hole明確割蓆──政治任務唔好搞我，我都係睇住個經濟做嘢，該減息就減息，不會減凸，也不會被利用達成政治任務。何況減息子彈好有限，如太快耗盡，到時就真係攬炒。
所以，目前港股big picture就係：一、貿戰大機會拖到出年，亦唔會達成任何協議，加稅再加稅，反制再反制，最後經濟齊齊直插；二、減息幫唔到個市幾多，不要太興奮，啲股彈起要識走，而唔係掉頭追貨；三、港股金融地位褪色，外資吸引力大減，場外的暫不會流入，場內的亦會趁彈套現離場；四、避險情緒非常強烈，金價大漲小回，美國長短債息倒掛，不利後市。
彈散格局下，操作方面，業績期就完，要博業績都八八九九，宜減少出手了；另一邊廂，期結明日就到，淡友本月大獲全勝，呢兩日可能再壓深一點平倉，慎防突襲。業績期後，大行勢將再下調企業盈利預測，隨時是下月跌市的觸發點。
www.facebook.com/2012jason
異動尋寶 - 魏力 舊文
來源 source: http://hk.finance.yahoo.com
