收市閒情 - 千頌C 2019年9月18日
【收市閒情】官媒送港交所白燈籠 - 千頌C
官媒將「停市打大鱷」咁大個功勞硬質畀港交所，李小加唔知唔會嚇到飆汗呢？ 資料圖片 適中字型 較大字型
話說近期港交所（388）向倫交所提親，八人大轎去到門口，點知人哋一句：「傾刁？不了，請回。」再大喝一句送客，港交所就面懵懵，死撐講句：「I will be back, Juliet.」
事實上，單刁本來已傾得唔啱時候，都唔講特朗普吹雞全球反中資；香港一場逆權運動，令全世界都知香港赤化中。英國家陣脫歐存亡之際，哪來閒情逸緻同你搞私奔另起火頭？
更好笑係，中共喉舌日前出咗篇奇文，《做空港股突襲投行 唱淡配合索羅斯夥漢奸黎策動暴亂變天》。內文大約係話，索羅斯策動金融戰，去配合顏色革命，仲一次過沽20萬張期指（黎智英喺篇文嘅角色純粹係做標題 ）。
劇情講到9月4日，港股因林鄭撤回送中條例而大升，內文講到「索羅斯發現事與願違、形勢不利，9月5日開始大手筆拋出期指空單，企圖最後一博。」點知！第二日天滅Soros，港股期貨死server，2點仲停埋市，令索羅斯慘蝕24億，再次敗走香港！據報道，今次打大鱷最大功臣，係港交所使出一招：關門打狗！嘩！李小加睇到呢度唔知唔會嚇到飆汗，文內提到「有消息指，港交所『趁機』打大鱷，而這個大鱷就是企圖捲土重來的索羅斯。」
假設官媒所言屬實，即係話，港交所係會為咗達成某啲長官意志，不惜扮死機兼停市；犧牲嘅係一大批機構投資者、輪商、散戶、以至係港交所多年建立嘅聲譽及公信力。
港交所今次提出收購，市場一般相信係為政治買保險，係國家任務；但官媒今次將「停市打大鱷」咁大個功勞，硬質畀港交所，變相喺佢頂花轎放多個白燈籠，提醒英美，「單刁有伏呀，港交所好可能已變『黨交所』啦」。想單刁成事？首先封住啲大配角把口先，如果唔係？結局咪就係好似羅密歐與茱麗葉咁，攬炒！
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.finance.appledaily.com
