金手指 - 孫柏文 2019年10月22日
【金手指】英鎊下一步點炒 - 孫柏文
英國一旦宣佈大選，民調會同時出，市場到時一見硬脫歐派將大勝，英鎊會大插插。 資料圖片 適中字型 較大字型
上周二，本欄重申喺九月尾叫大家揸英鎊嘅建議當中，一定要喺英揆同歐盟話有協議後，英國國會審議前沽出平倉。因我喺九月尾時話過，連孫柏文呢個全球分析脫歐單嘢數一數二嘅專家，雖睇通英國國會一定玩嘢，不過睇唔透點玩。即係上個禮拜五要平。因上周中，英政府同歐盟有協議，定咗上周六去辯論表決。真係不出我所料，禮拜六英國國會嘅反對派真係一嘢通過要英政府向歐盟提出延後脫歐嘅草案。
之前如果你有「只要信、不要問」咁跟我炒英鎊。我就再提一提你，如果想再喺英鎊上做嘢，就要喺延後脫歐申請被歐盟批准後，不過英國國會未叫大選前沽英鎊。因大選，硬脫歐派議員將會大勝，到時英鎊會大插插。
點解唔係宣佈大選時沽？因一宣佈大選，啲民調亦同時出，市場到時一見硬脫歐派將大勝，就會快過你咁沽英鎊。你個價會唔靚。
如果你係忠實讀者，你亦可能會問：「你上周先話支持硬脫歐嘅選民，只佔三分一。點解硬脫歐派會大勝呢？」哎，你咁問真係好令我失望。因做得我嘅忠實fan屎，都仲係停留喺啲陀地「國際專家」嘅分析水平。因今次大選唔係講脫唔脫歐啦，而係講究竟當人民進行公投後，政府會否落實結果。定係好似現時咁，國會議員啋你人民有味。咁嘅議題，你覺得個大選結果會點？
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.entertainment.appledaily.com
