冰說聰明 - 青冰 2019年10月24日
【冰說聰明】橫琴租地 送大禮前菜 - 青冰
為慶祝澳門回歸廿周年，又要顯示一國兩制成功，中央送大禮係必然之事。 資料圖片 適中字型 較大字型
呢輪澳門真係多消息，繼上星期青冰寫過的澳門交易所笑料，近日人大正審議法案，批准澳門租用橫琴口岸及延伸土地，第一眼望落仲以為係澳門吞併橫琴，原來此規劃已經講咗好耐，只係蓮花及橫琴口岸的兩地兩檢，變為在橫琴一鑊過檢，而在「租界」內將依照澳門法律實施管轄。
幾年前，唔少香港的上市公司已對橫琴感興趣，發展地產項目，記憶中信德（242）有個服務式住宅，將於下年落成，麗新系亦有個旅遊娛樂項目開咗，但如果以六大賭場來說，就只有銀娛（027）有發展橫琴的計劃。
翻查資料，銀娛在2014年已跟珠海簽訂協議，在橫琴買咗塊地，準備發展超高檔渡假村，不過呢個橫琴概念每年都出現年報，卻遲遲未開波，究竟問題在哪真係無人知。但半年前，副主席呂耀東喺北京見傳媒時好肯定咁講，進軍橫琴係必然方向，更認為如要落實中央發展澳門為世界級旅遊休閒中心，首要是解決土地不足問題，都係嘅，啲地都起曬賭場及娛樂設施，澳門雖然人唔多，遲早要面對高樓價，年輕人冇屋住的困局。
林鄭搵唔到地起樓，惟有向發展商及鄉紳埋手，威逼利誘，成效如何暫時未知，但以政府辦事能力，相信只會事倍功半。至於澳門，為慶祝回歸廿周年，又要顯示一國兩制嘅成功，送大禮係必然之事，橫琴口岸租予澳門管轄可能係第一步，時機成熟後租多幾塊地畀澳門起公營房屋，更可收買人心。講真吖，租地亦唔係石破天驚嘅創舉，百幾年前上海都有幾個租界畀英、美、法，更何況租畀澳門，做場靚show。
近幾個月澳門賭收不濟，大行對賭股看法趨向保守，但12月底就係回歸廿周年，最唔應該看淡，應該係賭股。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.entertainment.appledaily.com
