【大茶飯】巴巴染藍的最後障礙（青冰）
這些年來，阿里巴巴(9988)所得到傳媒的眷顧總比騰訊(0700)少，箇中的原因很多，但以投資回報計，近年阿里巴巴不會比騰訊遜色，不過，唔like就是唔like，唔抽就是唔抽，因為這已不是普通企業上市咁簡單，今次唔講抽唔抽，集中講染藍之路。
戰友都
知恆指將於下年檢討是否納入同股不同權(W股)，料5月將有結果，看似是為阿里巴巴染藍而舖路，然而美團(3690)將會更受惠，皆因阿里巴巴仍受制於一個最重要的障礙，就是第二上市。按恆指編選準則，第二上市將不能進入恆指，而睇返阿里巴巴的招股書第111頁所講，巴巴係按上市規則第19C章上市，亦即係第二上市，因此會在若幹條例下獲得豁免遵守，而招股書亦引述該上市條例，如果在最近的財政年度，巴巴在全球交易所的成交額中，有55%是來自香港的話，聯交所將視巴巴為雙重主要上市，將不再享有相關豁免。
恆指的準則，是接受雙重上市的股份加入，換言之，只要日後巴巴成交暢旺，係可以解決埋最後的障礙。阿里巴巴ADR在2019年的日均成交額，是27億美元，折合約210億港元，戰友可能會話，香港點會做得到200億呀，但又提返你，當阿里巴巴在港上市後，本身持有ADR的香港的大小基金，將有機會回流至本港，雖然在美國的交易成本低，但始終交易時區會是另一個重要因素，你估你的大中華基金經理，真係會每個淩晨幫你睇住咩，如果有得揀，揸返港股會更有效率，而另一方面，港股通南下的資金將為數不少，在此消彼長下，交易額超過55%，並非不可能。
不過由於係計財政年度，阿里巴巴的財年已經過咗8個月，相信要下一個財年才能成事，下個財年由2020年3月開始，換言之搞得嚟，染藍將會是2021年之事，不過青冰都幾肯定，下年恆指完成W股染藍的諮詢後，傳媒又會話阿里巴巴入得喇，咁當然下年青冰都會再寫多一次兩次甚至三次，呃多幾次稿啦。
巴巴仲有一個染藍捷徑，就是下年從ADR退市，咁就不是第二上市啦，不過照現時睇梗係無此需要，但如日後中美爆發金融戰，在美上市的中概股將會相當蝕底，退市亦是自保的選擇，染藍只是副產品而已。
--
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
