智取大市 - 晉佳 2019年12月11日
【智取大市】貪婪空間有極限 - 晉佳
安踏往績顯示盈利增長平穩，唔會有太大驚喜，出年有冇機會賣到40倍預測PE？睇嚟貪婪空間有限。 資料圖片 適中字型 較大字型
之前講過分析醫藥股值唔值博，可以睇近年最高預測市盈率，同埋未來一年每股盈利增長預測，去估算未來一年最樂觀上升空間。同一套可以放喺安踏（2020）之上，安踏之前挑戰80蚊，預測市盈率不知不覺去到33倍，係2007年高位水平。安踏往績顯示佢盈利增長平穩，唔會有太大驚喜，一年後，安踏正常情況保持盈利增長三成，如果股價一年再升三成，都係賣相若估值。咁佢出年有冇機會賣到40倍預測PE？喺銀紙氾濫，回報低迷嘅年代，係咪咁癲好難估，至少呢種預期非常投機，要40倍PE有人去接貨，就要有好多人估佢可以值50倍PE樓上，有幾多人咁癲先？
識計數嘅投資者喺理性同貪婪比拼一下，發覺貪婪空間有限，加上安踏呢類高估值增長股年初至今冇明顯回調過，絕大部份時間慢升或者橫行，對部份持貨者嚟講早已到曬價，見佢未跌自然唔沽，但一跌就自然大家齊齊鬥快獲利。
大浪似未去到盡頭，不過餘下嘅盈利空間係投機多過投資，邊隻值得買嚟揸，就要逐隻秤一秤。就好似2014年科網濠賭股升浪一役，濠賭股全線見頂，科網死咁大半，但騰訊（700）及後仍遠遠破頂，個股增長潛力更為重要。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
