【異動尋寶】熱炒股回氣 幾時撈值博？（魏力）
【異動尋寶】熱炒股回氣 幾時撈值博？（魏力）
新一輪關稅死線（12月15日）就到，在此敏感時刻，投資者一係已買定離手，一係就等貿談揭盅先出手，呢一刻行出來賭方向，無疑同自己荷包過唔去。個人判斷係，好大機會暫緩執行新一輪關稅，繼續慢慢傾，咁
樣個市唔會有明確方向，多數係悶到年尾，出年再算。
行文至此，電話就彈出一個彭博訊息，指美方將暫緩12月15日的關稅，以免緊張局勢升級，影響首階段談判的進行。報道引述消息指，雙方亦正磋商降低已徵收商品的關稅稅率，作為首階段協議的部份內容。
消息一出，歐股跌幅略為收窄，港股夜期由跌轉升，人仔兌美元亦見升值，但幅度不大，反映市場仍非常審慎，一日未有正式公佈，隨時又彈出彈入，信唔過。
講番中美經濟，美國明顯贏幾條街，有本錢拖住傾；反觀阿爺GDP明年向「5字頭」進發，工業縮、出口弱，消費又被高樓價所遏抑，想大力放水又驚谷爆泡沫，唔放水經濟又加速下行，因此只能「吊命式放水」。如此情況，中方會是較逼切想「有刁」的一方，但又不能讓步太多，又要有體面的下台階，隨時傾到2047。明年繼續炒與貿戰關係不大的股份，似乎是既定的方向。
昨日市況方面，指數「點穴」悶到發慌，但不少今年熱炒的板塊如體育、飲食、物管股等，紛紛現獲利回吐。基金年結埋數，減持部份持股獲利，合情合理，加上貿談死線在即，承接力薄弱下，一跌就滾雪球踩落去，加深跌幅。記得魏力11月中開始已提醒戰友「食糊潮」將至，目前似已應驗。
咁目前應否撈底？睇基本面是可以的，但究竟大戶幾時先食完糊？我同你都唔知，越接近年底，理論上風險越低，犯不著本週在big event前去冒險。仍有興致落場的話，小注抽抽新股，或向「無蟹貨」的半新股埋首就好。
www.facebook.com/2012jason
異動尋寶 - 魏力 舊文
來源 source: http://hk.finance.yahoo.com
