收市閒情 - 千頌C 2019年12月11日
【收市閒情】誠哥派錢都優雅過人 - 千頌C
李嘉誠表演極速派錢10億，派得優雅，唔係人人都做到。 資料圖片 適中字型 較大字型
「派錢，都要俾人鬧？」
香港政府上年4月公佈派錢4,000後，就俾人鬧足一年。點知李嘉誠表演極速派錢10億，一個轉身，射個3分波，成功將波叔條眉剃到毛都冇條！事實上，「派錢」好多人做過，但能夠派得好似超人咁優雅，就唔係人人都做到。
1）優雅，講求清脆利落，正如你唔會用呢兩個字去形容一個扭扭擰擰麻麻煩煩嘅港女啩？李嘉誠「應急錢」計劃，雖然都要審批，但由申請到收錢，一個月都唔使，要應急起上嚟，真係名副其實，幫到手！最後仲要比原先10億多派900萬。政府4,000蚊呢？初衷好似係補漏拾遺，成個過程，又多甩漏，又多嘢遺失，真係等你開飯嘅，死得！
2）說一個人優雅，衣著未必係走在潮流嘅尖端，但會有style時尚得來係令人覺得係舒服嘅。「應急錢」申請嘅只係上網交張form，審批嘅就用Google Cloud AI去極速處理。
IT行內朋友就透露，今次「應急錢」用嘅技術，都係用一啲現成嘅技術。當然更加唔會好似波叔咁請一大班人，逐封信用人手拆，然後一封一封咁用去審批咁低科技。
3）優雅係由內而外，派錢，最怕出現兩種反效果，一種係施捨；第二種就係土豪！即係咩？幣少囉，明曬！超人最叻係，公佈過程表現大方得體，講明會「以最信任的態度」去處理審批。同時，表現humble，新聞稿用字謙遜「盡一點綿力」、「如計劃安排有未臻完善之處，期盼各界提供意見」、「同舟共濟，渡過難關」。當大量香港富商，紛紛想同真香港人割席時，李嘉誠反而真係伸出援手，出聲出力仲出錢，真誠互信，這是優雅。
以上所說三點，本來正是一個以人為本、有管治威信嘅政府，不可或缺嘅特質……再睇返林鄭政府有咩特質？Errr……家陣香港好似係警察國家。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.entertainment.appledaily.com
