廣告經綸 - 文廸晞 2019年12月13日
【廣告經綸】政府怕「每次一蚊」交稅 - 文廸晞
反送中運動爆發後，有網民發起以「每次一蚊」方式交稅，亦有人呼籲罷交稅。資料圖片 適中字型 較大字型
你收到稅單未？沒錯，今年確是遲了一大截。聽講，遲到原因有兩個：一來由於立法會提早於7月初休會，早前復會才通過稅務寬免條例草案；二來政府真係怕咗市民「每次一蚊」交稅會倒蝕（即若果有人逐蚊逐蚊透過PPS交稅，每交一蚊，PPS就收取政府兩蚊手續費）。
聽一些銀行行家講，近排政府正積極與銀行業界研究對策，以解決這個「每次一蚊」的頭痛問題。可惜就等同政府其他施政措施，不是遲到就係無到，好自然至今仍在研究當中，一切尚未解決，所以有好多稅單暫時hold起咗。
以前，這個「綠色炸彈」是大家最不想收到的，如今，想不到它竟變成一封最不敢寄出的信。就算你有張良計，我亦有過牆梯，聽聞市面推出了一個「攬炒繳費機械人」，由程式代勞，用戶可以輕鬆用「每次一蚊」的方法繳費和交稅，無痛無癢，一招見效。
今年，政府將接納更多分期繳稅免附加費申請，為繳付利得稅、個人入息稅及薪俸稅人士暫時紓困。如此一來，對銀行及財務公司來說，交稅時間遲咗事小，借錢交稅需求細咗反而事大；致令每年稅季都搶攻稅務貸款市場的預算大失，對生意帶來巨大打擊。
勢估唔到，這場反送中運動會影響到整個「稅務與經濟」問題。廣告及市場推廣亦受牽連，做與不做都變得不太重要了。對於納稅人，起碼遲咗交稅，啲錢放喺自己個袋長久一點還是更好一點。
今次運動帶來的獨特影響，可謂前無古人，後無來者。假若「一蚊交稅」發生了，最大損失者可能係政府，但最終受益的會係邊個？據了解，PPS由20間持牌銀行組成的易辦事及電訊盈科旗下的HKT合作營運。換言之，一半收益將會分給20間銀行，另外一半當然分給電盈的大老闆李澤楷是也。
文迪晞
mailto:heyadmen@gmail.com
heyadmen@gmail.com
廣告經綸 - 文廸晞 舊文
來源 source: http://hk.entertainment.appledaily.com
